Жер жүзіндегі қазіргі ахуал әлемнің барлық мемлекеттерін өздерінің қорғаныс қабілетін нығайтуға мәжбүрлеп жатыр. Бұл туралы V халықаралық «KADEX-2018» қару-жарақ және әскери-техникалық мүлік көрмесінің ашылу салтанаты кезінде Мемлекет басшысы Нұрсұлтан Назарбаев айтты.
«Шыны керек өздеріңіз де жақсы білетіндей, Қазақстан тәуелсіздік алған тұстан бері алыс-жақын шетелдермен тату-тәтті көршілікті нығайтуға бағытталған бейбітсүйгіштік саясат жүргізіп келеді. Алайда жаһандағы қазіргі таңдағы ахуал барлық мемлекеттерді өздерінің қорғаныс қабілетін нығайтуға мәжбүрлеп отыр. Неге? Мұның себебі көп. Осы ретте біз де ҰҚШҰ (Ұжымдық қауіпсіздік шарты ұйымы) аясында дәл осыны жасауға ұмтыламыз», – деді Нұрсұлтан Назарбаев өз сөзінде.
Елбасының атап өткеніндей, қарулы күштердің қорғаныс саласын дамыту мемлекет басымдығының бірі болып саналады. Осы ретте, Орталық Азия өңіріндегі жалғыз саналатын KADEX халықаралық көрмесі қорғаныс саласын жүзеге асыруда негізгі рөлге ие болып отыр.
«Осынау жылдардың аралығында ол ауқымды оқиғаның, қорғаныс әлеуетін нығайту мен елдер арасындағы әскери-өнеркәсіптік ынтымақтастықты дамытудың тиімді алаңдарының біріне айналып үлгерді. Қазіргі кезеңдегі жаңа технологиялардың дәуірі қауіпсіздікті қамтамасыз етуде де, сонымен қатар әлеумет пен экономиканы одан әрі қарай жаңғыртуда да аталған саланың айрықша маңызды екенін ешкімге жасырын емес»,- деді Мемлекет басшысы.
Осы орайда, Қазақстан Президенті «KADEX-2018» қару-жарақ және әскери-техникалық мүлік көрмесі алғаш рет ҚР Қорғаныс және аэроғарыш өнеркәсібі министрлігінің қамқорлығымен өтіп жатқанын тілге тиек етті.
«Біз бұл бағдарламаны өзінің мақсаты мен мазмұны жағынан ерекше етіп жасауға тырыстық. Мұндай кездесулер, бағдарламалар бүгінгі біз куә болып, байқап отырған әлемдік деңгейдегі геосаяси тұрақтылықтың өршуі жағдайында барынша өзекті деп білемін», – деді Нұрсұлтан Назарбаев өз сөзінде.
Естеріңізге сала кетелік, Астананың халықаралық әуежайының әскери секторы аумағында V халықаралық «KADEX-2018» қару-жарақ және әскери-техникалық мүлік көрмесі өз жұмысын бастаған болатын.
V халықаралық «KADEX-2018» қару-жарақ және әскери-техникалық мүлік көрмесі 26 мамырға дейін жалғаспақ.
Осынау көрмеге, әлемнің түкпір-түкпірінен, оның ішінде – Ресей, Беларусь, Қырғызстан, Армения, Түркия, Иордания, Әзербайжан, Израиль, Италия сынды 40-тан астам елдердің өкілдері қатысады.
Ал Беларусь, Бельгия, Болгария, Бразилия, Германия, Израиль, Үндістан, Испания, Италия, ҚХР, Нидерланды, РФ, АҚШ, Сербия сияқты әлемнің 28 елінің 318 кәсіпорыны өз өнімдерін ұсынатын болады.
Тағы бір айта кетерлік жайт, KADEX қару-жарақ және әскери-техникалық мүлік көрмесі өткізіліп келе жатқанына биыл 5 -ші жыл толды. Бастысы, осы уақыт аралығында түрлі қорғаныс өнеркәсібі өнімдерін өндіруші компаниялар мен тұтынушылар арасында өзара ыңғайлы әрі тиімді байланысты орнату мен дамытуға жол ашылды. Және де бұл көрме түрлі елден келетін қорғаныс күштерін технологиялық тұрғыда жаңғырту мәселелері жөнінде тәжірибе алмасу үшін таптырмас алаңға айналды.
Биыл көрмеде 10 павильон жұмыс істейді, олардың ішінен: Түркия, Қытай және Ресейдің 3 жеке павильоны, қазақстандық «Қазақстан инжиниринг» ҰК» АҚ, «Қазақстан Парамаунт инжиниринг» ЖШС, «Қазтехнология» АҚ кәсіпорындарының павильондары, одан бөлек космонавтика саласының жетекші үлгілері ұсынылатын ғарыш қызметіне арналған павильон алғаш рет қойылып отыр.
Шара барысында отандық 17 кәсіпорын әскери техниканың 57 бірлігі мен әскери азаматтық мақсаттағы 162 бұйымның тұсаукесерін өткізбек.
Көрме аясында «Қазақстандағы ғарыш күндері» халықаралық форумы, «Cyber and Digital Security» және «Advanced Def Tech» конференциялары өтеді. Аталған шаралар барысында әлемнің түрлі елдерінен келген мамандар мен сарапшылар қорғаныс өнеркәсібі, әскери-техникалық ынытмақтастық, ғарыш қызметі мен ақпараттық қауіпсіздіктің маңызды мәселелері төңірегінде пікір алмасып, заманауи кезеңдегі киберқорғаныс жөніндегі сауалдарды талқылайды.
Тағы бір тілге тиек етер жайт, биылғы көрме Астананың 20 жылдығымен тура келіп отыр. Мұны Президент Нұрсұлтан Назарбаев та атап өткен болатын.
«Халықаралық «KADEX-2018» қару-жарақ және әскери-техникалық мүлік көрмесінің ашылуы құтты болсын! Бесінші рет өткізіліп отырған айтулы шара биылғы жылы Астананың 20 жылдығымен тура келіп отыр. «Қазақстандағы ғарыш күндері» атты форумның ұйымдастырылуы – биылғы көрменің басты ерекшелігі болып табылады. Мұнда әлемдік ғарыш саласының жетістіктеріне арналған арнайы павильон ашылды», – деген еді Елбасы.