Алматы облысында Қаскелең өзенінің жағасындағы тастың үстіне шығып, суретке түспек болған жас әйел суға ағып кетті, деп хабарлайды Sputnik Қазақстан.
Қайғылы оқиға кеше “Нұрлы Тау” демалыс орталығы аумағында болған. Республикалық жедел құтқару жасағының (РЖҚЖ) құтқарушылары Қаскелең өзеніне батып кеткен 35 жастағы әйелдің денесін кешкі сағат 9-да алып шықты.
“Іздеу жұмыстары үш сағатқа созылды, марқұмның денесі қайғылы оқиға болған жерден қашық жерден табылды. Қатты ағыс пен күннің батуы іздеу жұмыстарын қиындатты. Әйелдің денесі қоқыс пен бұтақтарға оралып қалған”, — деді РЖҚЖ құтқарушы-медбикесі Екатерина Клочко.
Куәгерлердің айтуынша, әйел тастың үстіне шығып, суртке түспек болғанда, өзенге құлап кеткен. Оқиға компания корпоративтік мерекесін атап өткен “Нұрлы Тау” демалыс орталығының аумағында орын алған.
РЖҚЖ құтқарушылары таулы өзендер маңында абай болуды және қауіпсіздік ережелерін сақтауды ескертеді.