Астана-Ерейментау-Шідерті республикалық маңызы бар авто жолдың 205-ші шақырымындағы айналма жолды су шайып кетті. Бүгінгі таңда Астанадан Павлодарға Қарағанды арқылы ғана қатынауға болады.
Бұл туралы BNews.kz ҚР ІІМ Төтенше жағдайлар комитетінің ресми өкілі Руслан Иманқұловтың мәлімдемесіне іслтеме жасап, хабарлайды.
– Қатты жауынның салдарынан Ақмола облысының Ерейментау ауданы аумағындағы Өлеңті өзенінде су деңгейі көтеріліп, Астана-Ерейментау-Шідерті республикалық маңызы бар автожолдың 205-ші шақырымында айналма жолды су шайып кетті. Негізгі жолда бұған дейін болған көпір жаңғыртуға байланысты бұзылған.
Аталған жол учаскесінде көліктердің кептелісіне жол бермеу мақсатында, бүгін сағат 14:20 бастап Астана-Павлодар тас жолының 16-шақырымынан 205-шақырымына дейінгі учаскесі жабылды. Астанадан Павлодарға Ерейментау ауданы аумағын айналып, Қарағанды арқылы қатынауға болады, – деді Руслан Иманқұлов.
Ведомство өкілінің айтуынша, қазір уақытша жолдың төсемін қайта қалпына келтіруге «Юнисерв» компаниясының 25 жұмысшысы мен 20 техникасы жұмылдырылған. Аталмыш учаскеге 2000 текше метр қиыршық тас жеткізілді.
– Сондай-ақ Құмай өзенінде су деңгейі көтеріліп, облыстық маңыздағы Ерейментау-Аршалы жолының 19-шы шақырымындағы көпір қирады. Көпірдің бүлінген аумағы 6 метрді құрайды. Су шайып кеткен учаскенің екі жағынан қауіпсіздік бекеттері қойылды. Аталмыш жолмен қатынас жабылды, – деп атап өтті төтенше жағдайлар өкілі.
Қазір Павлодарға тек Қарағанды арқылы, сондай-ақ пойызбен қатынауға болады.
Естеріңізге сала кетсек, өткен аптада нөсер жауынның салдарынан Ақтөбе облысының Қандыағаш қаласында жер үйлер мен аулаларды, мектеп пен балабақшаның жертөлелерін су басқан болатын. Табиғаттың асау мінезімен алысқан құтқарушылар сегіз мың текше метрден астам су сорды.