Мұғалімге тіл тигізгендерге 786 мың теңгеге дейін айыппұл салынады

Оқу-ағарту министрлігі ұстаздардың құқығын қорғау мәселесін тағы бір еске салды. Ведомство мәліметінше, педагогтердің абыройына нұқсан келтіргендерге қомақты айыппұл салынады.

Министрліктің заң басқармасының директоры Гүлден Ақытаева мұғалімдерге заңсыз талаптар қоюға болмайтынын атап өтті. Мәселен, ұстаздарды өз жұмысына қатысы жоқ шаруаларға жегу, артық есеп-қисап талап ету, негізсіз тексеріс жүргізу, тауар немесе қызмет сатып алуға мәжбүрлеу заңға қайшы әрекеттер.

«Мемлекеттік мектептердің мұғалімдерін жекеменшік ұйымдардың іс-шараларына қатыстыруға да тыйым салынған. Заң бұзғандарға ескертуден бастап 200 АЕК-ке дейін айыппұл қарастырылған. Бұл шамамен 786 мың теңге», деді ол.

Ал ата-ана немесе оқушы тарапынан тіл тигізу, қорлау да әкімшілік құқықбұзушылық саналады. Мұндай жағдайда 40 АЕК-ке дейін (157 мың теңге) айыппұл немесе 5 тәулікке дейін қамау жазасы бар. Егер мұғалімге жала жабылса, іс қылмыстық деңгейге дейін көтеріледі.