Мұғалімдердің 70 проценті қосымша ақы алатын болады
Қазақстанда биыл 200 мыңдай мұғалімнің айлығына 30 пайыздық үстемақы қосылады.Бұл туралы Үкімет отырысында ҚР Білім және ғылым министрі Ерлан Сағадиев айтты, деп хабарлайды Қазақпарат.
Министр Үкімет отырысында орта білім беруді жаңа мазмұнға көшу жұмыстары туралы айтып берді.
«Жаңартылған мазмұнды енгізбес бұрын бағдарлама Назарбаев зияткерлік мектептерінде, одан кейін 30 пилоттық жоба апробациядан өтті. Мектептерде пилоттық жоба ретінде енгізілген жүйенің салыстырмалы нәтижесі бойынша, білім сапасының орташа балы екі есеге өсті. 2016-2017 жылғы оқу жылынан бастап 1 сынып, былтырғы оқу жылынан бастап қосымша 2, 5 және 7 сыныптар көшсе, биылғы оқу жылынан бастап 3, 6 және 8 сыныптар кезең-кезең бойынша көшеді. Жаңартылған мазмұнға көшкен мұғалімдердің айлықтарына 30 пайыз үстемақы қаңтар айынан бастап төлене бастады. Барлығы 200 мыңнан астам мұғалім, яғни биыл мұғалімдердің 70 проценті қосымша ақы алатын болады. Ұстаздар қауымы атынан Елбасына үлкен қолдау білдіргені үшін үлкен рахметімізді айтамыз», – дейді Ерлан Сағадиев.
«Бастауыш білім беру деңгейінде бірыңғай базалық оқулықтар енгізіледі. 3, 6 және 8 сыныптардың оқулықтары қазіргі уақытта дайын. Енді сараптамадан өтіп, қоғамдық бағалау порталына шықты. Оны 20 мыңнан астам адам көріп, ұсыныстарын айтып жатыр», – дейді министр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе