Атырау, Ақтөбе және Қостанай қалаларының тұрғындары кеше түнде аспаннан беймәлім жарық бірнәрсені байқағанын айтып, түсірген суреттерін әлеуметтік желіде жарыса жариялаған еді. Осыған қатысты бүгін Қорғаныс министрлігі түсінік берді.
Бұл туралы ҚР Қорғаныс және аэроғарыш өнеркәсібі министрлігінің баспасөз қызметіне сілтеме жасап, Tengrinews.kz хабарлады. Министрлік келтірген дерек бойынша, Ресейдегі баллистикалық зымырандардың ұшырылғаны жайлы қазақстандықтарға алдын ала айтып отыру мүмкін емес.
“Баллистикалық зымырандарды ұшыру – Ресей Федерациясы қарулы күштерінің жеке шаруасы. Шет елдердегі қаруландыру, қорғаныс өнеркәсібі кешендері және олардың қарулы күштерінің қызметі Қазақстанның құзыретіне кірмейді. Бұл қандай да бір шабуыл әрекеті немесе мемлекеттік шекара ережелерін бұзу әрекеті емес”, – деді министрліктің баспасөз қызметіндегілер.
“Бүгінде біз “Байқоңыр” ғарыш айлағынан жоспарлы түрде ұшырылатын зымырандар туралы хабарлап отырамыз. Бірақ баллистикалық зымыран ұшыру ғарыш қызметіне жатпайды”, – деді ведомстводағылар.
https://www.youtube.com/watch?time_continue=8&v=yzVjX61hf3Y