«Мамасын мойнына отырғызса да өзі біледі»: Блогер Елдос Сметовты жақтады

Париж Олимпиадасының чемпионы атанған Елдос Сметовтің анасымен қарым-қатынасы желіде қызу талқылануда. Бұл ретте, әлеуметтік желі арқылы танылған актриса, блогер Сабира Жарасқызы чемпионға жақтасып, оны сынағандарға дүрсе қойды.

Оның ойынша, анасы мен баласының арасындағы байланысты бұлайша ел алдынан талқылау – надандық!

«Чемпионымыз Елдос Сметов жайында. Күнұзаққа мыңдаған видео көрдім. «Неге қасында әйелі емес, мамасы?». Адамдар, бұл шектен шыққандық пен абсурд емес пе? Бастарыңызды қайда сұғып жатқандарыңыз туралы бір ойланып көру керек сияқты. Ойланыңыздар! Сіздер бөтен біреудің отбасына бас сұғып жатырсыздар. Ол мамасын басына көтеріп ала ма, мойнына отырғызып ала ма өзі білетін шығар. Әр отбасы – ол бір бөлек мемлекет. Сол мемлекеттің ішінде өз ережелері бар, өз принциптары бар. Ол кісі үшін мамасы бірінші орында болса, ол оның құқығы, өзінің жеке ойы. Доғарыңыздар! Әр адамның өз қалауы, өз түсініктері болады. Егер ол адамның өмірлік ұстанымдары сіздікімен сәйкес келмесе, оны жерден алып, жерге салу – надандық, ақымақтық! Не шаруаларыңыз бар? Маған түсініксіз. Әр отбасы кімнің қайда жүру керектігін өзі шешсін. Құрметті мін іздеп жатқан әйелдер қауымы, түймедейді түйедей етіп, араласпайтын дүниеге араласып, талқыланбайтын тақырыпты талқылап жатырмыз. Өз күйеуіңіз чемпион болады, сол кезде күйеуіңіздің қасына тұрып алыңыз. Ал мамасын артына жіберіңіз», – деп жазды ол.