ҚР Тәуелсіздігінің 25 жылдығына орай, Маңғыстау облысының барлық санаттағы мүгедектеріне 5 айлық есептік көрсеткіш көлемінде, яғни 10 605 теңгеден төленеді.
Осы мақсатта бюджеттен 230 миллион теңге бөлу қарастырылған. Бұл туралы Маңғыстау облысы жұмыспен қамтуды үйлестіру және әлеуметтік бағдарламалар басқармасының басшысы Гүлмира Қалмұратова хабарлады, деп жазады lada.kz.
«Екінші деңгейлі банктердің карта-шоттарына ақша аудару басталды. Көмек алатындардың қатарында республикалық және облыстық маңызы бар зейнеткерлер, ҰОС ардагерлері және мүгедек интернационалист-жауынгерлер де бар», – деді Гүлмира Қалмұратова.
Маңғыстау облысы жұмыспен қамтуды үйлестіру және әлеуметтік бағдарламалар басқармасының басшысы ҚР Тәуелсіздігіне орай облыста берілетін төлемнің аздығына қарамастан, бір реттік көмектің жыл сайын 5 мерекеге орай тұрақты беріліп келе жатқанын атап өтті.
«Төлемақы мөлшері аудандар мен қалаларда бірдей, 2017 жылға да бекітілген. Бюджетте қосымша материалдық көмек үшін 1,5 миллиард теңге қарастырылған. Бұл қаржы әлеуметтік пакетті құрайды және бұл қаражат мұқтаж жандарға көмек болады деп үміттенеміз», – деді Гүлмира Қалмұратова.