Қызылорда облысында соңғы бір жылдың өзінде аймақта ауыл шаруашылығы өнімдерінің экспорты 48, ал күріш экспорты 53 процентке артты.
Бұл туралы ҚР Үкіметінің баспасөз орталығында өткен баспасөз конференциясында мәлім болды. Аймақ басшысы Қырымбек Көшербаев өңірдің индустриалық даму қарқынымен қатар аграрлы саладағы жетістіктер жайлы кеңінен айтты.
«Агроөнеркәсіп секторында өсімдік шаруашылығын әртараптандыру бағдарламасы нәтижелі жүзеге асырылуда. Соңғы 3 жылдың ішінде мал азықтық дақылдар, майлы дақылдар және азықтық дән алқабы 6 мыңнан астам гектарға артқан. Өндірістік негізде картоп, көкөніс және бақшалық дақылдар өндірісін дамытуды бастадық. Оған қоса, осы кезең ішінде әсіресе, сорт өнімділіктерін арттыру есебінен күріштің жалпы өнімі 20 проценттен асаға өсті. Биыл аймақта 500 мың тоннадан астам күріш жиналды», – деді аймақ басшысы.
Сондай-ақ, жуырда уақ малдың алғашқы партиясы Иранға жөнелтілді. Жыл аяғына дейін аталған елге 10 мың бас қой экспортталатын болады. Ал, болашақта аймақтан ет және ет өнімдерін сыртқа шығару көзделуде.
Ет экспортын одан әрі арттыру үшін облыста 2 ет комбинатының құрылысын жүргізу жобалары жүзеге асуда. Құс етін өндіру саласында да серпін бар. Қармақшы ауданында құс фабрикасы салынуда. Жылына 1500 тонна тауық етін шығаруға қауқарлы кешен келер жылы іске қосылады.