Астанада 32 жастағы елордалық тұрғынды зорлаған үш ер адам сотталды.
“Алматы” аудандық прокуратурасының өкілдері қылмыстық істің мән-жайын айтып берді, – деп хабарлайды Tengrinews.kz.
Сәуірде Астананың үш тұрғыны спирттік ішімдік ішкен. Қала кафелерінің біріне бара жатқан олар Уәлиханов көшесінде 32 жастағы ер адаммен танысқан. Олар жаңа танысымен бірге пәтеріне барып, арақ ішкен.
“Жәбірленуші көп мөлшерде арақ ішіп, кейін ұйықтап қалған. Сол кезде үш ер адам қылмыс жасау туралы ойға келген. Бір топ адам алдын ала келісім бойынша алкогольге мас күйде шарасыз жатқан ер адамға қатысты сексуалдық сипаттағы әрекет жасаған. Жәбірленуші сексуалық зорлық қана емес, дене жарақатын да алған. Бірнеше сағат үйде мәжбүрлі түрде болған ол қашып шыққан.
Жәбірленуші көшеге жүгіріп шығып, жақын маңда орналасқан мешіт ғимаратына кірген.
Мешіт имамы болған оқиғаны полицияға хабарлаған. Кейін күдіктілер ұсталған”, – деп хабарлады прокурорлар.
Бұл іске қатысты биыл 2-тамызда Астананың №2 Алматы аудандық сотының үкімімен үш ер адам ҚР Қылмыстық кодексінің 121-бабының 2-бөлігінің 1-пункті, 126-бабының 2-бөлігінің 1-пункті бойынша айыпты деп танылып, әрқайсысы жеті жылға бас бостандығынан айырылды.