Қытай Халық Республикасынан ата-жұртына оралған оралман Гүлжан Мәуітханға қатысты іске нүкте қойылды. Шекарадағы кеден бекетінде алынған ақшалай қаражат оралман-анаға қайтарылатын болды, – деп хабалайды Шығыс Қазақстан облысы прокуратурасының баспасөз қызметі.
Атажұртқа көшіп келе жатып, ақпан айында Майқапшағай кеден бекетінде 50 мың доллар шамасында ақшасынан айырылып, кеденшілер тарапынан «контрабандамен» айналысты деп айыпталған Гүлжан Мәуітханның ісі қазақ қоғамында үлкен резонанс тудырған еді.
“Үстіміздегі жылғы 4-сәуірде Қытай Халық Республикасынан Қазақстанға орламан ретінде көшіп келген Гүлжан Мәуітханнан шекараның кеден бекетінде декларацияда көрсетпеген 40 000 АҚШ доллары алынған. Гүлжан Мәуітхан Қытайда өз үйін сатып, осы қаражатқа Астанадан үй сатып алмақшы болған. Ол шекара арқылы ақшалай қаражатты өткізу ережелерін білмегенін түсіндірген.
Нәтижесінде, «Экономикалық контрабанда» бабы бойынша сотқа дейінгі тергеу басталған.
Зайсан аудандық соты Гүлжан Мәуітханды кінәлі деп танып, 40 000 АҚШ долларын мемлекет пайдасына алу туралы шешім шығарған.
Алайда апелляциялық сатыда сот ісін жүргізудің тілі туралы талап сақталмағандықтан шешім бұзылған.
Шығыс Қазақстан облысының прокуратурасы осы істі мұқият зерделеп, Гүлжан Мәуітханның әрекеттерінде қылмыстық құқық бұзушылықтың құрамы болмағанын анықтады,
себебі, Гүлжан Мәуітхан Қытайдан ақшалай қаражатты құпия түрде әкелу ниеті болмаған деген қорытындыға келді.
Мұндай шешім қабылдауға – егде жасында Қытай елінен атамекені Қазақстанға қайтуын мақсат етіп, өмір бойы жинаған дүние мүліктерін сатып, оралман мәртебесін алып,
еліне оралған Г.Мәуітханды «экономикалық контрабанда» жасады деп айыптап, оның 40 000 АҚШ доллары қаражатын тәркілеудің әділетсіз екендігі негіз болды,”
– делінген хабарламада.