“Қырғызстаннан әкелген…”. Лаңкестік айыбымен ұсталғандардың мақсаты белгілі болды
Алматыда террористік әрекет жасамақ болды деген күдікпен ұсталғандардың не істегісі келгені белгілі болды.
Бұл туралы Алматы қалалық ІІД-нің өкілдері өткізген арнайы баспасөз мәслихаты кезінде мәлім болды.
Алматы қалалық ІІД-нің ресми өкілі Салтанат Әзірбектің айтуынша, тергеу кезінде күдікті Жұмағұлов, Омаров, Әбішевтер құқық қорғау органдарына қарсы бүлік шығармақ болғаны анықталды.
“Тергеуде Жұмағұлов бас болған топ құқық қорғау органдары мен мемлекеттік құрылымдарға қарсы шабуыл ұйымдастырмақ болғанын дәлелдейтін деректер табылды. Оған қоса олар полиция қызметкерлерінің отбасын қорқытып-үркітпек болған. Бет-ауыздарын бүркеп мемлекеттік орган басшыларының атына видеохабарлама жіберуді де жоспарлаған”, – деді Салтанат Әзірбек.
“Жұмағұлов ақшаны бопсалау арқылы табуды жоспарлаған. Осы мақсатта Қырғызстаннан мылтық сатып алған. Ол барлық кінәні мойнына алатын адам іздеумен айналысқан. Олардан ұялы телефондар мен сим-карталар табылған”, – деді Салтанат Әзірбек.
Кәсіпкерлерді бопсалаудан түскен ақшамен Жұмағұлов құқық қорғау органдарының қызметкерлеріне қарсы белсенді шабуыл жасамақ болған.
Айта кету керек, 25-қарашадан бастап қалалық ІІД Жұмағұлов, Омаров, Әбішевке қатысты қылмыстық істі тергеп жатыр. Күдіктілерге ҚР Қылмыстық кодексінің 256-бабы, яғни «Терроризмді насихаттап, терроризм актісін жасауға ашық түрде шақырды» деген айып тағылып отыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе