Қырғыз Республикасы президентіне үміткер болған Омурбек Бабанов ұлтаралық алауыздық тұтатты деп күдікке ілінді.
Бұл туралы Қырғыз Республикасының Бас прокуратурасына сілтеме жасап, қырғыз басылымдары хабарлады.
«Қырғыз Республикасының Бас прокуратурасы қылмыс нышандары бойынша Қырғыз Республикасының Жоғары Кеңесінің депутаты Омурбек Бабанов пен басқа да тұлғаларға қатысты Қылмыстық кодекстің 297-бабы 1-бөлімі, яғни “Конституциялық құрылысты күшпен өзгертуге үндеу” және 299-бабы 1-бөлімі, яғни “Ұлтаралық, нәсіларалық және дінаралық алауыздық тудыру” бойынша қылмыстық іс қозғады», – делінеді Қырғызстан Бас прокуратурасының хабарламасында.
«Халықтың өзбек ұлтынан болып табылатын бөлігінен дауыс жинау мақсатында, көпшілік алдында сөз сөйлеген Бабанов өзбек ұлтының құқығына шек қойылуы, мемлекеттегі ұлттық теңсіздік және мемлекеттік органдардың өзбек ұлтына қысым көрсетуі жөнінде пікір білдірген. Мұнан кейін тұрғындарды белсенді түрде наразылық танытуға шақырған.
Өткізілген кешенді филологиялық-политологиялық сараптама нәтижесі бойынша анықталғандай, Бабановтың көпшілік алдында сөйлеген сөзінде ұлтаралық араздық тудыруға, адамдарды бағынбауға және қазіргі билікті құлатуға бағытталатын үндеу бар», – дейді Бас прокуратурадағылар.
Сонымен қатар, мемлекеттік сот-сараптамалық қызметінің қорытындысына сәйкес, электронды БАҚ-да жарияланған ақпараттарда монтаж белгісі жоқ екені анықталғаны аталып өткен. Тергеу жұмыстары жүргізілуі үшін қылмыстық іс ҚР Мемлекеттік Ұлттық қауіпсіздік комитетіне тапсырылды.