ҚР СІМ Алеппо маңында болған терактілерге қатысты мәлімдеме жасады
ҚР СІМ Сирияның Алеппо қаласының маңында болған терактілерге байланысты мәлімдеме жасады.
Бұл туралы ҚР сыртқы істер министрлігінің баспасөз қызметі хабарлады.
“Қазақстан 2017 жылдың 15-сәуірінде Сирияның Алеппо қаласының маңында болған терроризм актілерін қатаң айыптайды.
Үкімет пен қарулы оппозиция арасындағы келісімдердің аясында әл-Фуа ауданынан Кефрайға эвакуацияланып жатқан 100-ден аса адам осы қылмыстың құрбаны болды. Жазықсыз бейбіт азаматтардың, әсіресе балаларды өлтіру ерекше наразылық туғызды, бұл лаңкестердің рақымсыздығын көрсетеді. Сирия халқына, осы терактілерден қаза тапқандардың туыстарына қайғырып көңіл айтамыз, зардап шеккендерге денсаулық тілейміз”, – делінген алдын ала таратылған хабарламада.
“Қазақстан терроризм мен оның кез келген түрімен ымырасыз күреске қолдауын тағы бір мәрте растайды және осы бағыттағы халықаралық координацияны нығайтуға, жаһандық контртеррористік коалиция құруға шақырады”, – деп мәлімдеді сыртқы саяси ведомство.
Еске салайық, өткен жексенбіде Рашидин аумағындағы автобустар тұрағында жойқын жарылыс болған еді. Азық-түлік өнімдерін тасымалдаған көлік ішіндегі жанкешті автобус тұрағының маңына келіп, жарылыс жасаған. “Терактіден қаза тапқандардың саны 70 адамнан асты, ал жарақат алғандардың саны 130-ға жетті. Өртеніп кеткен автобустардың маңында күйіп кеткен денелер көп”, – деп хабарлаған еді шетеллдік БАҚ-тар.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе