Жаңа технологиялардың сан түрі сатылымға шығып, күнбе-күн дамыған сайын елімізде қауіпсіздік, қорғаныс саласы да осы көшке ілесу қажеттігі туралы мәселе көптен бері көтеріліп келеді.
Бұл тұрғыда мынадай бір қызықты жайтқа назар аударсаңыздар. Бұдан бұрын бірқатар ақпарат құралдары «Қазақстан инжиниринг» ҰК» АҚ-ның еншілес компаниясы – «Қазақстан инжиниринг» R&D орталығы» ЖШС-ы киберқауіпсіздікті қамтамасыз ететін арнайы бағдарламалық жабдықтауды әзірлеумен айналысып жатқанын хабарлаған еді.
Осынау бағдарламалық жабдықтауды жасаудың негізгі мақсаты – Қазақстанның қорғаныс өнеркәсібі кәсіпорындарының киберқауіпсіздігін қамтамасыз ету.
Айта кетелік, бұл мәселе Мемлекет басшысы Нұрсұлтан Назарбаевтың ерекше назарында.
Өзінің былтырғы жылғы халыққа арнаған Жолдауында Президент киберқылмыспен күрестің өзектілігі жыл өткен сайын арта түсетінін тілге тиек етіп, бұл ретте
Үкімет пен Ұлттық қауіпсіздік комитетіне «Қазақстан киберқалқаны» жүйесін қалыптастыру бойынша шара қабылдауды тапсырғаны есімізде.
Елбасы Ұлт жоспарында ақпараттық қоғамды дамыту бойынша нақты талаптар қойылғанын айта келе:
«Біз арнайы заң жобасын қарастырып жатырмыз. Бірақ мұның екінші жағы да бар.
Соңғы 3 жылдың ішінде интернеттегі заңға қайшы контент 40 есеге дейін артқан, яғни Қазақстанға берік киберқалқан құру қажет» деген еді.
Елбасы Жолдауы жарияланғаннан соң арада бірнеше күн өткеннен кейін Қорғаныс және аэроғарыш өнеркәсібі министрлігі оқу-әдістемелік жиын өткізген. Жиынға қатысқан әскери қызметкерлерге ақпараттық саясат бойынша теориялық және практикалық білім берілген.
«Ақпараттық қоғам дамуының деңгейі мемлекеттік инстиутттардың қызмет ету үдерісіне, кез келген елдің экономикасы мен қорғаныс қабілетіне әсер етпей қоймайды.
Азаматтардың қажеттілігіне жауап бере алатын ақпараттық қоғамның болуы аяғына нық тұрған мемелекеттің қажетті шарттарының бірі болып табылады, ал ақпараттық сала – ұлттық қауіпсіздіктің басым бағыттарының бірі.
Ақпараттық ресурстардың, басқару және байланыс жүйелерінің мүлтіксіз жұмыс істеп тұруы елдің қорғаныс қабілеті үшін өте маңызды», – деп мәлімдеген еді сол жолы Қорғаныс және аэроғарыш өнеркәсібі министрі Бейбіт Атамқұлов.
Мінекей, күні кеше «Қазақстанның киберқалқаны» тұжырымдамасының алғашқы қорытындысы шығарылды. Қорғаныс және аэроғарыш өнеркәсібі министрі Бейбіт Атамқұловтың жетекшілігімен
2022 жылға дейінгі «Қазақстанның киберқалқаны» киберқауіпсіздік тұжырымдамасын жүзеге асырудың бірінші қорытындысын жасауға арналған кеңейтілген жиналыс өткізілді.
Бұл жиынға 365info.kz тілшісі де қатысып бірақ маңызды ақпаратқа қанығып қайтқан болатын.
Қорыта айтқанда, ҚР Қорғаныс, Ішкі істер министрлігі, Ұлттық қауіпсіздік комитеті, ҚР Президенті жанындағы мемлекеттік басқару академиясы, «Казахтелеком» АҚ, «Транстелеком» АҚ байланыс операторлары, Кибер шабуылды талдау және тергеу орталығы және Қазақстандық ақпараттық қауіпсіздік қауымдастығының өкілдері қатысқан осы жиында аса өзекті дүниелер сөз болды.
Соның ішінде:
Мұның барлығы өз кезегінде Қорғаныс және аэроғарыш өнеркәсібі министрлігіне үлкен міндет жүктейтіні анық.
Бейбіт Атамқұловтың айтуынша, министрлік мұның бәрін жақсы түсініп отыр. Киберқауіпсіздік саласындағы заң бұзушылықтардың алдын-алу және де компьютерлік шабуылдар кезінде өзара іс-қимылды ұйымдастыруда бірізділік таныту бағытында жаңа жобалар жасалып жатыр екен.
Дегенмен бұл мәселе айтуға ғана оңай. Киберқалқан құру бағытында іске қарағанда, сөз көп емес пе?
Айталық, біздің еліміз
жаһан бойынша түрлі кибершабуылдарға өте жиі ұшырайтын мемлекеттердің ішінде алғашқы ондыққа енеді екен.
Бұл саладағы білікті мамандардың пікірінше, соңғы жылдары киберқылмыс саны екі есе артқан. Ендеше киберқалқанды тездетіп құру кезек күттірмейтін мәселе екендігі анық.
Бұл тарапта біз Кибершабуылдарды зерттеу мен сараптама жасау орталығының президенті Олжас Сәтиевке хабарласып, сарапшының осы орайдағы пікірін білген едік.
– Олжас мырза, еліміздің кибершабуылдар жиілігі бойынша 6-орынды иемденгені рас па?
– Иә, рас. Бірақ, мемлекет бұл мәселені шешудің жолдарын қарастырып жатыр. Осы жылдар ішінде «Электронды үкімет», «Үкімет азаматтар үшін» сияқты жүйелер қалыптасқанын білесіздер.
Бірақ, мойындайтын бір жайт бар.
Ел азаматтарының компьютерлік сауаттылығы әлі де төмен. Әлі күнге дейін қазақстандықтарға поштадан түсініксіздеу, беймәлімдеу адамдардан келген сілтемелерді ашуға болмайтынын ұғындыра алмай келеміз.
Мынаны түсіну керекпіз: қазіргі компьютерлік нарық осыдан 10 жыл бұрынғы нарықпен салыстырғанда мүлде бөлек. Ол кездегі есепшілер үшін хакерлік шабуылдар таңсық болатын. Ал қазіргінің есепшілеріне есеп-шотты сақтау үшін хакерлермен күресуге тура келеді. Себебі, олар аса құпия деген кілттердің өзін бұзып, халыққа үлкен шығын келтіріп жатыр.
– Елбасымыз Нұрсұлтан Назарбаев бұл тұрғыда “Киберқалқан” жүйесін құруды ұсынған еді. Былтырғы жылы Мемлекет басшысының халыққа Жолдауында ақпараттық қауіпсіздік мәселесіне баса назар аударылған. Осы бағыттағы атқарылған жұмыстарға көңіліңіз тола ма?
– Президентіміз бұл мәселені дер кезінде көтеріп отыр. Біздегі бір мәселе, қазіргі таңда Қорғаныс министрлігінде жұмыс істейтін білікті мамандарға
қауіпсіздік бойынша бағдарламаларды жазуды үйрету аса қажет деп есептеймін.
Неге? Себебі бұл жалпылама қауіпсіздік емес деп білемін. Оның бағыт-бағдары мүлде бөлек арнада екенін түсіну керекпіз. Мемлекет басшысы атап өткендей киберқалқан құру қазіргі таңдағы – кезек күттірмейтін мәселе.
Меніңше, Қорғаныс және аэроғарыш өнеркәсібі министрлігінің бастамасымен еліміздегі барлық маңызды саланы кибершабуылдан қорғайтын жүйе жасаған маңызды. Киберқауіпсіздікке келгенде елімізде жеке тұлғалық мәліметтерді сақтау мәселесіне жіті назар аударуымыз қажет-ақ.
Жалпы киберқауіпсіздік тақырыбының осындай жоғары деңгейде талқыланып жатқанының өзі айырықша мәнге ие. Дегенмен, өз басым алдағы уақытта
«Киберқалқан» жүйесі қалай жұмыс істейтінін анықтап алуымыз қажет деп есептеймін. Неге?
Иә, «Киберқалқан» жүйесін құру идеясы айтылды, бірақ, мойындауымыз керек әзірге оның қай бағыт-бағдарда дамитыны белгісіз болып отыр. Айталық бұны жаһандық тәжірибеде әр мемлекет түрліше ұйымдастырған. Мәселен, бұл жүйе қажетсіз, қауіпті, арандатушы сайттарды бұғаттап тастайтын файрвол болуы да мүмкін. Мұндай жағдайда желідегі жұрт тек белгілі бір ресурстарды ғана пайдалана алатын болады.
Егер солай жасайтын болсақ шет мемлекеттердің тәжірибесіне үңілу керек. Мысалы, Америкада желіні автоматты түрде талдап, бақылауға алатын, әлдебір оқиғаларды болжай алатын ірі, қымбат жүйелер бар.
– Бұл бағыттағы жұмысты қолға алуға келгенде кешігіп қалған жоқпыз ба осы?
– Маңызды мәселенің ерте-кеші жоқ деп білемін. Мысалы, Microsoft-тың болжамы бойынша, 2020 жылға қарай хакерлік шабуылдан әлемдік экономикаға келтірілген шығын сомасы 3 трлн долларға жетеді екен. Демек, кибершабуылдың қарқыны өсе түспесе, азаймайтыны анық.
Біздің мақсат әлемдік үрдістен қалыс қалмай, мемлекеттік қауіпсіздік жүйесін құруды ойластыру.
Ал Қазақстанның Қорғаныс және аэроғарыш өнеркәсібі министрі Бейбіт Атамқұловтың айтуынша, Қазақстанның «Киберқалқан» жүйесі қарқынды жасақталып жатыр.
«Қазақстанның Киберқалқаны жүйесі» еліміздің ақпараттық және киберқауіпсіздігі саласындағы мемлекеттік органдармен жүзеге асырылатын ұйымдастырушылық-құқықтық және ұйымдастырушылық-техникалық шаралардың кешенінен, аппараттық-бағдарламалық кешендер мен жобаларынан тұрады. Заңнамалық базаның басым бөлігі дайындалып бітті.
Электронды шекара деп аталатын коммуникацияны басқарудың орталықтандырылған жүйесі бар, шифрді қолданатын заңсыз ақпаратқа шектеу қоятын қауіпсіздік сертификаты жасалды», – дейді ол.