Естеріңізде болса күні кеше Парламент депутаттары Мемлекет басшысы Нұрсұлтан Назарбаевтың 40 офицерді БҰҰ миссиясына жіберу туралы ұсынысын қолдаған болатын. Бұдан сырт Қазақстанның 120-ға жуық әскери қызметшісі Ливандағы бітімгерлік миссиясына қатысады.
Осы ретте Қорғаныс министрінің орынбасары Талғат Мұхтаров Қазақстанның бітімгершілерінің БҰҰ миссиясындағы жұмыс тәртібін түсіндіріп өтті.
Оның айтуынша, Қазақстан бітімгершілері ұйым миссиясы аясында алты ай сайын ауысып тұрады.
«Бүгінгі уақытта қажетті дайындық жұмыстарын аяқтауға жақынбыз. Біздің жоспарымызға сәйкес, біздің ротаны аталған миссияға алдағы қараша айына дейін жібермекпіз», – деді өз сөзінде Талғат Мұхтаров. Оның айтып өткеніндей, Біріккен ұлттар ұйымының ережесіне сәйкес, бітімгершілік операцияларына қатысушы құрамдар алты ай сайын ауысады.
Айтуынша, қазірде «Қазполк» БҰҰ стандарттарымен дайындықтан өтуде.
«Қазполк» әскери қызметшілері ағылшын, түрік, неміс және араб тілдерін емін-еркін меңгерген.
Сонымен бірге, теориялық және тәжірибелік дайындықтары түрлі байқаулар, семинарлар мен оқу-жаттығулармен шыңдалды. Бұл шаралар Қазақстаннан бөлек АҚШ, Ұлыбритания, Түркия, Германия, Франция, Үндістан, Пәкістан және басқа да елдерде ұйымдастырылды», – деді ол.
Осы орайда Қорғаныс министрінің орынбасары БҰҰ миссиясы жайында аз-кем ақпаратпен бөлісе кетті.
«Биылғы жылдың 15 маусымында Қазақстанның Парламенті еліміздің Конституциясының 53-бабына сәйкес, 40 адамға дейін әскери бақылаушылар мен штаб офицерлерін БҰҰ-ның бірқатар бітімгершілік миссияларына жіберу шешімін жасады.
Сонымен қатар 120 адамға дейінгі бітімгершілік ротаны Ливандағы БҰҰ-ның Уақытша Күштерінің құрамына жіберу жолымен бейбітшілік пен қауіпсіздікті қолдау жөніндегі халықаралық міндеттемелерді орындау үшін ҚР Қарулы Күштерінің әскери қызметшілерін бағыттау туралы шешім қабылдады», – деді ол.
Естеріңізге сала кетелік, былтырғы жылғы 1-ші қаңтар айынан бастап Қазақстан Біріккен Ұлттар Ұйымының (БҰҰ) Қауіпсіздік Кеңесіне тұрақты емес мүше ретінде қызметін жүзеге асырып келеді.
БҰҰ-ның Қауіпсіздік Кеңесінде Қазақстан жаһандық бейбітшілікті қолдау жөніндегі миссиялардағы өзінің әскери бақылаушылары және бітімгершілерінің санын арттыруға ниетті екенін мәлімдеген болатын.
“БҰҰ-ның миссиясына контингентті жіберу тек халықаралық қауіпсіздікті нығайту ісіне салмақты үлес қосып қана қоймай, Қазақстанның әлемдік қауіпсіздіктің жауапты мүшесі ретінде, оның ішінде Қазақстанның БҰҰ Қауіпсіздік Кеңесіне тұрақты емес мүше болуының қорытындысын шығаруы аясында беделін нығайтады”, – деген болатын Мемлекет басшысы.