ҚР Парламенті Сенатының төрағасы Қасым-Жомарт Тоқаев Қырғыз Республикасының президенті Алмазбек Атамбаевтың мәлімдемесіне қатысты пікір білдірді.
Еуразиялық экономикалық одақтағы, қырғыз бен қазақ шекарасындағы жағдайды сынға алған көрші елдің президентін сенатор Twitter-дегі жеке парақшасындағы жазбасында сөз етті.
“Атамбаевтың Қазақстанға кезекті рет күсәлап тиісуі көршілердің арасындағы достық қарым-қатынасқа зиянын тигізгеннен басқа пайдасы жоқ.
Мұндай эмоцияға үлкен саясатта орын жоқ.
Қырғыз елін блокадалау туралы сөз боп жатқан жоқ. Еуразиялық экономикалық одақтың нормасы мен талаптарын орындау керек. Болды. Келіссөздің құралы деген, міне осы”, – деп жазды Тоқаев.
Айта кетелік, кеше Атамбаев өз елінде тұрақты даму жөніндегі ұлттық кеңестің отырысында Еуразиялық экономикалық одақтағы және қырғыз-қазақ шекарасындағы жағдайды сынға алды. Оның айтуынша, бизнесті дамыту үшін ірі нарық керек, сондықтан да қырғыз елі еуразиялық экономикалық одаққа үлкен үміт артып енген болатын. Алайда Атамбаевтың пікірінше, Қырғызстан Еуразиялық одақтан жырақтап қалғанына бір айдың жүзі болыпты-мыс.