Адамшошырлық жағдайда тұрған Қаскелең ауруханасы жабылмайтын болды. Тұрғындардан түскен арыздардан кейін Алматы облысының әкімдігінде аурухананы жаппау туралы шешім қабылданды.
Бұл туралы 31-арна хабарлайды.
Денсаулық сақтау министрі менингококк инфекциясынан көз жұмған 19 жастағы қыздың өлімінен кейін, сондай-ақ ғимараттың адамшошырлық жағдайда тұрған суреттерін көрген соң Қаскелең жұқпалы аурулар ауруханасына келді. Науқастың жедел жәрдем туралы айтқан шағымдарын тыңдаған Елжан Біртанов клиниканың басшылығын ауыстыруды және жұқпалы аурулар ауруханасын жабуды тапсырған болатын.
Ал науқастарды Талдықорғандағы немесе Алматыдағы ауруханаға жіберуге шешім қабылдады.
Алайда, Алматы облысының әкімдігі министрдің шешімі тұрғындар арасында үрей тудырғанын айтты. Халық аурухананы жаппауға өтініш білдірген екен. Енді облыс билігі ғимаратты қалпына келтіру үшін қаражат іздеуде.