Еліміздің құқықтық жүйесіне ағылшын сотының элементтері енгізіледі.
Бұл туралы сала мамандары Жоғарғы сот жанындағы Халықаралық кеңесте айтты. Қазір сарапшылар шетелдік тәжірибені зерттеп, оның тиімді тұстарын анықтап жатыр.
Айта кетейік, келер жылы «Астана» халықаралық қаржы орталығы іске қосылғаннан кейін оның аумағында ағылшын-саксон құқықтық жүйесі жүреді. Яғни инвестиция төңірегіндегі даулардың барлығы сот преценденті бойынша шешілетін болады. Бұл жаңашылдықтың басты мақсаты – істерді қарау мерзімін барынша қысқартып, сотты әділ жүргізу.
– Біздің мақсатымыз – біздікіне ұқсамайтын жүйелердің ішінен пайдалысын өзіміздің жүйемізге алып келу. Оны біздің жүйеміздің тәртіптеріне бағындыру, соттарға түсіндіру. Келешекте мынадай жағдай болуы мүмкін. Сот заңға сүйеніп өз шешімін шығарады. Одан басқа оның алдында дәл осындай істі шешкен соттың ісін өз шешіміне тіркейді.