Адвокат Әсел Нұрмақанова(Тоқаева) қалыңдық ұрлығын адам ұрлығы деп есептемеу керек деген ұсыныс тастады.
Бұл туралы “Қазақстан адвокаттары” тобында жазды.
Желідегі топта адвокат Руслан Шағатаев қорғалушысы ҚР ҚК 125 бап, 2 бөлім, 1,3 тармақтары (Ұйымдасқан түрде адам ұрлау) бойынша айыпталып жатқанын айтып, әріптестерінің кеңесін сұрады.
«Менің қорғалушым көзсіз ғашық болып, оны жоғалтып алудан қорқып қазақтың дәстүрі бойынша сүйікті қызын алып қашуды ойлаған. Бұл ойын достарына айтып, көмек сұрған. Тағы 3 досы да алып қашуға көмектесетін болды. 4 жігіт қызды жұмыс орнынан ұрлап, күйеу жігіттің үйіне апарып тастаған. 40 минут өткен соң полиция келіп, қызбен қоса күйеу жігітті өздерімен бірге алып кеткен. Қызды ұрлағаннан кейін оған ешқандай зорлық көрсетілмеген. Кетем деген қыз жігіттің бетінен ұра бастаған, жігіт оны тынышталдыру үшін бетінен бір рет ұрған. Содан қыздың бетіне кішкене зақым келген. Бірақ, денесінде ешқандай жарақаттар жоқ», – деп жазды Шағатаев.
Шағатаевқа жауап берген адвокат Әсел Тоқаева қалыңдықты ұрлаудағы мақсатын ескеру керегін айтты.
«Бөлек құрам енгізу керек. Үйлену мақсатында ұрлау деген сияқты. Оның да жазасы басқаша болады.Егер адамды мүлде басқа мақсатта ұрласа әңіме басқа», – дейді ол
Шағатаев оған жаңа арыз жазып, Жоғары сотқа немесе бас прокуратураға ұсыну керектігін айтты.
Өз кезегінде Тоқаева бұл ұсынысты жақсы қабылдады.