Қайтыс болған соң павлодарлық әйелдің жүрегі, бауыры, бүйрегі донорлыққа алынды

Павлодар қаласының 39 жастағы тұрғыны дәрігерлер ми өлімін анықтағаннан кейін донор атанды. Әйелдің ағзаларын алуға күйеуі мен ұлы келісім берген. Қазір реципиенттерге ағзаларды ауыстыру операциялары басталып кетті. 

Павлодар облысының трансплантология бойынша өңірлік үйлестірушісі Дмитрий Потеребухтың айтуынша, әйел ауруханаға түскеннен кейін төрт күннен соң көз жұмған. Себебі – геморрагиялық инсульт. Ми өлімі дәрігерлік консилиум шешімімен, клиникалық сынақтар мен аспаптық зерттеулер нәтижесінде расталған.

«Диагноз расталғаннан кейін туыстарымен сөйлестік. Олар бірден жауап берген жоқ, өйткені жақын адамынан айырылу – әр отбасы үшін ауыр соққы. Туыстары уақыт сұрады, ал келесі күні ағзаларды алуға саналы түрде келісім берді. Бұл шешім күту тізіміндегі науқастарға көмектесу үшін қабылданды», – деді Потеребух.

Маманның айтуынша, трансплантологтар бүйрек, бауыр, жүрек және көздің қасаң қабығын сәтті алды. Сол уақытта Астанада реципиенттердің қан талдаулары жасалып, тіндік сәйкестік тексерілді. Донорлық ағзалар биоконтейнерлер арқылы жеткізіліп, қазір ота жүріп жатыр.