“Із қалдырмай ұрады”. Ақтөбе зорлық-зомбылық күшейіп барады

7 маусым 2017, 17:35

kaz.365info.kz

Ақтөбеде отбасылық зорлық-зомбылық белең алып барады. Жыл басынан бері 31 әйел қолдау орталығынан көмек сұрап барған.

Бұл туралы “ҚазАқпарат” хабарлайды.

Ақтөбеде отбасындағы зорлық-зомбылық әртүрлі сипат ала бастады. Ақтөбе қалалық әйелдерді қолдау орталығы жыл басынан бері 31 нәзік жандыға көмектескен. Олардың тең жартысы қатты зәбір көріп, заңды түрді өз құқықтарын қорғай алмай отыр.

«Ақтөбеде отбасындағы зорлық-зомбылық жиілеп кетті. Зорлық-зомбылық отбасының әлеуметтік жағдайына, ерлі-зайыптының өмір сүру заңдылығына мүлде қарамайды. Неге екенін түсінбедік? Тіпті сырт көзге үлгілі болып көрінген отбасында да әйелді ұрып-соғу, психологиялық қысым көрсету кездеседі. Соңғы кездері ер адамдар әйелдерінің денесіне із қалдырмай ұратын әдісті қолданып жүр. Олар бұл әдісті жетік меңгерген екен. Оны балалар көреді, қайғырады»,- деді қалалық әйелдерді қолдау орталығының төрайымы Айгүл Дүйсенова.

Ақтөбелік мамандар ерлі-зайыпты ажырасқан кезде әйелдер өз құқығын қорғай алмайтынын айтып отыр. Өйткені бірге үй салып, оның иесі ер адамның ата-анасы немесе бауыры болса, әйел заң бойынша үлесін талап ете алмайды. Көбіне нәзік жандылар баспанасыз, табыссыз қалады.

«Жүкті әйеліне атынан несие алып, кейін оны үйінен қуып жіберетін ер адамдар да кездеседі. Тіпті «алимент талап етсең несие төлеуге көмектеспеймін» деп бопсалайды. Сондықтан балаларды отбасылық өмірге бейімдеп, жасөспірім шақта түсіндіру жұмыстарын жүргізу қажет. Тренингтер өткізу артық болмас. Көбіне екі отбасының өмір сүру заңдылығы екі бөлек болып, жастар келіспей, ажырасып жатады. Олардың ата-аналары араздасқан екі жасты қайта татуластыруды ойламайды, керісінше «баланы өзіміз бағамыз» деп қолдап отырады. Сол аралықта бала толық емес отбасында өседі»,-деді Айгүл Дүйсенова.