Заңсыз мигранттардың келуіне байланысты Испания Африканың солтүстік жағалауындағы Сеута автономды қаласында әскер мен полицияны жұмылдырды.
БАҚ-тың хабарлауынша, бір күнде Сеутаға теңіз арқылы рекордтық бес мың заңсыз иммигрант келген, олардың 1,5 мыңы кәмелетке толмағандар. Олар Испания аумағына жүзіп келіп, кейін Еуропаға бет алмақшы болған.
Патшалық билігі аймақтағы жағдайды реттеу үшін әскер жұмылдыру туралы шешім қабылдады. Сеута көшелерінде полиция мен азаматтық гвардияның қатысуын арттырды. 1,5 мыңға жуық мигрант Мароккоға кері жіберілді. Билік жағдай тұрақтанғанша заңсыз иммигранттарды отанына қайтаруды жалғастыратындарын атап өтті.
Сеута – Африка құрлығындағы Испанияның жартылай анклавы. Ол автономды қала мәртебесіне ие. Географиялық орналасуына байланысты ол көбінесе заңсыз көші-қон проблемасына тап болады. Қала шекараны қорғау үшін тікенді сымы бар алты метрлік дуалмен қоршалған.