Головкин мен Альварес негізінен тең түскен жоқ. Бірақ қазылар шешіміне дау айта алмайсыз. Ережесіз жекпе-жек шебері, атақты жерлесіміз Ардақ Назаров төрешілердің неліктен мұндай шешім жасағанын өзінше пайымдап берді.
“Расында, жігіттер керемет бокс кешін сыйлады. Көрермендер арасында отырған Майк Тайсонның өзі бірнеше рет орнынан атып тұрып ризашылығын білдіріп жатты.
Кездесудің тең болуы себептері: біріншіден бүгін Мексика халқының тəуелсіздік күні. Егер жеңісті Генаға берсе осынша халықтың айтулы мерекесінде 122 млн-ға жуық мексикалықтардың көңіл-күйі əп сəтте жер болатын еді. Екіншіден, беделді промоутер (мексикалық) Оскар Де Ла Хойяның ықпалы бұл жерде өте күшті.
Негізі, жекпе-жекте Гена көптеген раундта қарсыласын тықсыра қуа отырып өз басымдығын көрсетіп ұпай санымен жеңді, бұған күмəн жоқ.
Бірнеше раунд теке тіресте тең өткені де рас, соның ішінде Сауль Алварес тек екі раундта ғана жойқын соққысын дарытып басымдығын байқатты. Негізгі жеңіс біздікі. Бұл менің ойым, өз пікірім”, – деп жазды Назаров желідегі парақшасында.
Қазақстандық боксшы Геннадий Головкин (37-0, 33 КО) мексикалық бокстың жарық жұлдызы – Сауль Альвареспен (49-1-1, 34 КО) қарсы жекпе-жекте тең түсті.