Парламент Мәжілісінің жалпы отырысында «Газ және газбен жабдықтау туралы» заңға өзгерістер енгізу туралы заң жобасында сұйылтылған газды тек электронды сауда алаңдары арқылы өткізу ұсынылды.
Бұл туралы Baq.kz хабарлады.
«Сіз ұсынып отырған заң жобасы сұйылтылған мұнай-газ бен жабдықтаудың жаңа механизмін енгізеді. Енді электрондық сауда алаңдары арқылы ішкі нарықты газбен қамту жоспарланып отыр. Айтыңызшы, бұл механизм жекелеген өңірлерде электронды сауда-саттық алаңдарының болмауына байланысты сұйылтылған газ тапшылығына алып келмей ме?», – деп сұрады депутат Арман Қожахметов.
«Біріншіден, газ өндіруші мекемелер мен зауыттардың ішкі нарыққа газ беру міндеті сақталады. Екіншіден, ұсынылып отырған заң жобасында газды таратудың әдісі ғана өзгергелі отыр. Баяндамада айтылғандай, электронды сауда алаңдары біртіндеп, әуелі келесі жылдың 1 қаңтарынан бастап 10-20 процентке, содан кейін екі жылдың ішінде – 2019-2021 жылдары электронды сауда алаңдары барлық аймаққа енгізілетін болады. Сондықтан, екі жылдың ішінде барлық аймақ электрондық сауда алаңдарымен толықтай қамтылады. Сондықтан, қаралып отырған заң жобасы газдың тапшылығына әкеліп соқпайды», – деді Бақтықожа Ізмұхамбетов.
Айта кетсек, Парламент Мәжілісінің отырысында палата депутаттары «Газ және газбен жабдықтау туралы» ҚР Заңына өзгерістер мен толықтырулар енгізу туралы» заң жобасын бірінші оқылымда мақұлдаған болатын.