Оңтүстік Қазақстан облысында полицейлердің табиғат аясында демалуға қызметтік көлікпен шыққаны жайлы әлеуметтік желілерде фотолар тарап кетті.
Қазір бұл оқиғаға қатысты қызметтік тексеру жүріп жатыр екен. Қызмет формасында жүріп, қару асынған тәртіп сақшылары демалып жатқан жұрттың зәресін алса керек. Сақшылардың ерсі әрекетін көрген Машат тау шатқалында дәл сол кезде демалып жатқан жергілікті журналист Анар Сүлеева суретке түсіріп алып, өзінің әлеуметтік желідегі парақшысына жазған.
Белгілі болғандай, Машат тау шатқалында жүрген тәртіп сақшылары – Түлкібас ауданы ІІБ-ң қыззметкерлері болып шықты. Олар таулы аумақты қызмет бабымен тексеріп жүріп, түстік ішу үшін тоқтаған, дейді ОҚО ІІБ ақпарат және мемлекеттік тіл басқармасы басшысының орынбасары Спабек Жарқынбеков.
– Қызметтік тексеру жүріп жатыр. Үш қызметкер де ресми маршрутта болған. Олар қоғамдық тәртіпті қадағалау үшін патрульді көлікпен аралап жүреді. Арақ-шарап ішпеген. Қолдарында пакетке салынған нан мен айран болған екен. Адам болған соң, ондай-ондай болады ғой енді. Обед уақыты болған соң, көлеңкеге тоқтап тамақтануға отырған. Егер қадай да бір тәртіп бұзу анықталса, жазаға тартылады, деп жауап берді.