Бірыңғай жинақтаушы зейнетақы қоры басқармасының төрайымы осы қор жанынан құрылған қоғамдық кеңеске төрағалық еткен Досым Сәтпаевтың неге кеткенін түсіндіріп берді.
Бірыңғай жинақтаушы зейнетақы қоры басқармасының төрағасы Нұрбибі Наурызбаева зейнетақы активтерінің бір бөлігін жекеменшік басқарушы компаниялардың басқаруына беру үрдісінің мән-жайын айтып берді, деп хабарлайды LS басылымы.
“БЖЗҚ ақшасын жекеменшік компаниялардың басқаруына беру мәселесі көптеген қазақстандықтарды толғандырады. Бұл жұмысты қазір Ұлттық банк жүргізіп отыр. Олар қазір зейнетақы жүйесін реформалау бойынша ұсыныстарды әзірлеп қойды, онда салымшыларға өз жинақтарын басқаруға қатысу құқығын беру қарастырылған. Жобада зейнетақы активтерін басқару бойынша қазақстандық та, шетелдік те компанияларды құру көзделеді, салымшылар осы компаниялардан таңдап, өз ақшаларын сонда аударады”, – деп түсіндірді Наурызбаева.
Сонымен қатар Наурызбаева Досым Сатпаевтың қоғамдық ұйымнан шығу туралы жағдайға түсінік берді.
Еске салайық, бұдан бұрын Досым Сәтпаев экономист Рахым Ошақбаевпен және “Қаржылық еркіндік” қамқорлық кеңесінің басшысы Бота Жұмановамен бірге қоғамдық кеңестен шығып кеткені мәлімдеген еді. Сәтпаев өз кетісінің себебін БЖЗҚ басшыларымен мәселе талқысында өзара келіспеушіліктердің туындауымен түсіндірген еді.
Бір сөзбен айтқанда, сөз өтпейтін жерде біз неғып жүреміз деген сыңайлы Сәтпаев.
Өз кезегінде Наурызбаева бұл мәселеге қатысты өз көзқарасын білдірді.
“Иә, қор жанындағы қоғамдық кеңестің бірнеше мүшесі, сонымен қатар оның басшысы Досым Сәтпаевтың неліктен кеңестен шығып кету туралы шешім қабылдағаны көпшілікті қызықтыратынын мен білемін. Қоғамдық кеңестің мақсаты жинақтаушы зейнетақы жүйесінің маңызды мәселелері бойынша азаматтық қоғамның пікірі мен оны дамыту бойынша ұсыныстарды білдіру болатын.
Осы мәселелерді талқылауда қоғамдық кеңестің кейбір мүшелері жинақтаушы жүйені ғана емес, базалық және бірлескен бөлігін қоса алғанда, жалпы зейнетақы жүйесін реформалау бойынша ұсыныстарды қарастырып, енгізуі қажет деген пікірі туындады. Бірақ бұл идеяны кеңестің басқа мүшелері қолдамады,
себебі ол БЖЗҚ жанынан құрылған және бұл кеңес жинақтаушы жүйе мәселелерімен ғана айналысуы тиіс”, – деді ол.
Сөз соңында БЖЗҚ басшысы құрамында 29 адам бар қоғамдық кеңес өз жұмысын жалғастыратынын айтты.
Бұған дейін хабарлағанымыздай, зерттеулер департаментінің басшысы, Halyk Finance басқарма мүшесі Мұрат Темірханов барлық зейнетақы қаражатын жекеменшік басқаруға беру туралы ұсынысын білдірген болатын.
Еске салайық, Ұлттық банк зейнетақы қаржысын басқарушы компанияларға берудің мән-жайын түсіндірген еді. Сонымен қатар Ұлттық банк басшысы Данияр Ақышев БЖЗҚ басқаруында өзгерістер болатынын мәлімдеген еді.