Депутат елімізде сұйытылған газ тапшы болуы мүмкін екенін айтты
Мәжiлiс депутаты Бақтықожа Iзмұхамбетов 2019 жылы елiмiзде сұйытылған газ тапшы болуы мүмкiн дейдi. Сол себептен Парламент депутаттары сәйкес заң жобасын қарап жатыр.
Бұл туралы Baq.kz хабарлады.
Бүгiн Сенат депутаттары «ҚР кейбiр заңнамалық актiлерiне газ және газбен жабдықтау мәселелерi бойынша өзгерiстер мен толықтырулар енгiзу туралы» ҚР заң жобасын қарап жатыр.
«Аталған заң жобасы елiмiздегi сұйытылған мұнай газ нарығындағы жағдайға байланысты туындап отыр. Бүгiнгi күнi қолданыстағы «Газ және газбен жабдықтау» заңына сәйкес Энергетика министрлiгi бекiткен сұйытылған мұнай газының бағасы қосымша құн салығын есептемегенде 38 мың 701 теңгенi құрап отыр.
Бұл баға экспорттық бағадан ғана емес, көршiлес елдердегi көтерме бағадан да айтарлықтай төмен. Мұндай жағдай сұйытылған мұнай газын шығаратын зауыттар мен өндiрiстердi газды заңсыз экспорттауына итермелейтiнi сөзсiз.
Сондай-ақ, бағаның төмендiгiнен аталған зауыттар мен өндiрiстер өз зарарына жұмыс жасап отыр. Тек 2017 жылы олардың ала алмаған кiрiсi 48 миллиард теңгеден асты», – дедi заң жобасын таныстырған Мәжiлiс депутаты Бақтықожа Iзмұхамбетов.
Депутаттың айтуынша, соңғы жылдары сұйытылған мұнай газына сұраныс екi есе өскен. Дегенмен, 2019 жылы сұйытылған газ тапшылығы пайда болуы мүмкiн. Аталған заң жобасы осы тапшылықты болдырмауға бағытталған.
Бұл үшiн заң жобасында сұйытылған мұнай газын өндiретiн зауыттар мен өндiрiстердiң газды делдалдарсыз, тiкелей сату мәселесi қаралып отыр.
Заң жобасында электрондық сауда алаңын енгiзу қаралған. Ол 2019 жылдың 1-шi қаңтарынан бастап, 2021 жылдың 1-қаңтарына дейiн кезең-кезеңмен екi жылдың iшiнде енгiзiледi. Заң аясында тағы да басқа шаралар қарастырылған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе