Мәжіліс депутаты Абзал Құспан Шығыс Қазақстан облысының бұрынғы әкімі Даниал Ахметовке қатысты материалдарды құқық қорғау органдарына жіберуге уәде берді. Парламент мүшесі бұрынғы топ-шенеуніктің Тайвань арқылы Еуропалық қайта құру және даму банкінің (ЕҚДБ) миллиардтаған долларлық қаражатын шығаруға қатысы бар деп күдіктенеді.
«Даниал Ахметов әкім боп тұрған кезде Өскемен және Семей қаласы көшелерін жарықтандыруға деп Европа қайта құру және даму банкі арқылы 3, 6 млрд, оған қосымша бюджет тарапынан 1, 2 млрд, барлығы 4, 8 млрд бөлінген екен. Бұл жобаны Ахметов тарапынан жеке лобби жасалғанына дәлел ретінде оның әкім боп тұрғанда Европа қайта құру және даму банкінің Лондондағы офисіне келіссөз жүргізуге өзі барғанын айтады шағым иелері. Бірақ мәселе онда да емес, мәселе сол миллиардтаған қаражатқа қойдырған шамдардың басым бөлігінің жанып кеткендігінде және кепіл уақыты ішінде ауыстырылмауында», – деп жазады депутат.