Сүйінші! Димаш Құдайберген «Азияның ең танымал әншісі» (Best Asia popularsinger) номинациясы бойынша марапатталды.
Бұл жүлде оған Шанхай қаласында Mercedes Benz Arena алаңында өткен, ең үздіктерді марапаттайтын «China Top music Awards» мерекелік шарасында табыс етілді деп хабарлады ҚазАқпарат.
Азиядағы өнер саласының барлық жақсысын жинайтын салтанатты шараның 24-ші рет өтуінде көп тағатсыздана күткен бас жүлдені Димаш жұлып әкетті.
Кеште Димаш өзін барша әлемге танымал болуына себепкер, әлемде ең қиын бес әннің бірі саналатын француздың «SOS d’un terrien endétresse» әнін шырқап, көпшіліктің көңілінен шықты.
Марапаттау кезінде Димаш Құдайберген көрермендерге қазақ тілінде алғыс айтты.
«Ассалаумағалейкүм, құрметті әлеумет! Өте қатты қуаныштымын. Бұл – менің шет елдегі ең алғашқы үлкен сыйлығым. Ең алдымен, мен өзімнің ата-анама және де жан досыма көп рақмет айтамын, мені қолдап-демеу болып жүргендеріне. Және де менің бағымды ашқан, әлемге танытып жатқан «Singer» жобасына алғыс айтамын! Мені қолдап жүретін барша тыңдармандарыма рақмет айтқым келеді! Бар болыңыздар, аман болыңыздар! Бұл тек бастамасы ғана», -деді Димаш.
Айта кетерлігі, «China Top music Awards» – 1994 жылдан бері Азия елдеріндегі ең танымал әншілердің басын қосатын үлкен мерекелік шара. Бұл күнде ол Қытай музыкалық қоғамдастығындағы ең айтулы оқиғалардың бірі саналады. Сонымен қатар осы сыйлықты «қытайлық Грэмми» деп те атайды.