Батыс Қазақстан облысында үш және бес жастағы ұл мен қыз ата-аналарының қарауынсыз серуендеп жүргенде қазылған шұңқырға құлап, қаза тапты, деп хабарлайды Baq.kz ақпарат агенттігі mgorod.kz сайтына сілтеме жасап.
«Кішкентай қыз бен ұл далада серуендеп жүрген. Оларды көзден таса болғанын аңғарған кезде ғана іздей бастаған. Ауыл тұрғындары бүлдіршіндерді сол күні кешкі сағат 20.00-де көрші ауладағы қазылған шұңқыр ішінен тауып алды.
Қазіргі уақытта прокуратура мен аудандық ішкі істер бөлімі сараптама жұмыстарын жүргізіп жатыр. Орын алған жағдайға қатысты қылмыстық іс қозғалды. Шұңқырға құлап кеткен балалардың ата-аналарын жауапкершілікке тарту мәселесін құзырлы органдар шешеді», – дейді Қаратөбе ауданының әкімі Асхат Шахаров.
Балалар лас қоқысқа тұншығып көз жұмған Ауылдық округ әкімдігі балалар бір-біріне аға мен қарындас емес екенін айтты.