Биыл қаз дауысты Қазыбек бидің 350 жылдығы. Тамыз айында Қарқаралыда үлкен ас беріліп, аламан бәйге, республикалық деңгейдегі айтыс өтті. Сол шараның жалғасы ретінде жуырда Мәдениет және Спорт министрлігінің тапсырысымен Ш.Айманов атындағы «Қазақфильм» АҚ режиссерлері Ерлан Төлеутай мен Ғазиз Насыров түсірген «Қаз дауысты… би» атты деректі фильмінің тұсауы кесілді.
Қазыбек бидің рөлін Қайрат Кемалов сомдаған.
Одан басқа Алдабек Шалбаев, Саят Мерекенов, Іңкәр Әбдіраштар мол үлес қосып, фильмнің әрін кіргізіп отырды.
Қызы болып ойнаған Зарина Кәрмен әкесіне жоқтау айтып, қазақтың бір жоралғысын тұтас күйінде көз алдымызға әкелді. Деректі фильмнің ең үлкен ұтымды тұсы бүгінмен параллель жүргізуі, яғни бидің тоғызыншы ұрпағы боп келетін кейіпкердің өмірінен көріністер. Бидің тоғызыншы ұрпағы Қазақстан жұртшылығына аты мәлім суретші Кәріпбек Күйіков. Кәріпбек Күйіковтің полигон зардабынан Егіндібұлақ жерінде қос қолы жоқ боп туғанын елдің көбі біледі. Ол Нобель сыйлығын иеленген полигонға қарсы жобаның мүшесі. Оның да өмірі ел үшін алаң, болашақ үшін алаңға толы. Фильмде де Би атасының өмірі қазақтың келешегін уайымдаумен өткені сабақтастырылған. Қазыбек би Түркістандағы хан қорымында жерленген. Кәріпбектің сол жерге барып, атасына құран бағыштап отыруы да деректі фильмге кіріктірлген. Өзі ешқашан айтпаған шындығын, бидің тоғызыншы ұрпағы екенін мойындауы да тосыннан түсірілгенін режиссер фильмнен соң айтты.
Деректі фильмнің келешекте қазақ арналарынан көрсетілуін күтеміз. Себебі, Алашқа еңбегі сіңген, Қазақтың бірлігіне зор үлес қосқан нар тұлғалардың өмірімен жас ұрпақты таныстыру нағыз рухани жаңғырудың даңғыл жолына бастайтын бастама. Әр биге арнап осындай тиянақты деректі фильмдер түсіру жалғасын тапса, нұр үстіне нұр болар еді.
https://kaz.365info.kz/khajrattyn-kinosyndagy-shyndykh-zorlangan-khyzdyn-mamandygy-mygalim-nege-286586
Шынар Әбілдә