Биыл мектеп бітірушілердің барлығы қорытынды аттестаттаудан өткізіледі. Бұл жайында ақпарат ҚР Білім және ғылым министрлігінің фейсбуктегі ресми парақшасында жарияланды, деп хабарлайды ҚазАқпарат .
«Мектеп бітірушілердің барлығы дерлік қорытынды аттестаттаудан өткізіледі. Бұл талап «Алтын белгі» иегері атануға үміткерлер үшін де қойылған. 1-ші ақпаннан емтихан қабылдайтын комиссия құрылды. Комиссия құрамына пән мұғалімдері, ата-аналар комитеттері мен қоғамдық ұйымдардың өкілдері кірді. 1-ші наурызға дейін комиссия қорытынды аттестаттауды тапсыратын түлектердің тізімін жасады. Емтихан жұмыстарының материалдары 23-ші мамырға дейін Қазақстан Республикасының Білім және ғылым министрлігі тарапынан әзірленеді. Ал білім басқармалары емтихан материалдарын 27-ші мамырға дейін мектептерге жеткізеді»,- делінген таратылған ақпаратта.
Бірінші ана тілі мен әдебиеттен эссе жазуға 3 сағат уақыт беріледі, түлектердің таңдауына 10 тақырып ұсынылады: 5 әдеби және 5 еркін тақырып.
Екінші – алгебра және анализ бастамалары жазбаша, уақыты 5 сағат.
Үшінші – Қазақстан тарихы ауызша үш сұрақтан 30 билет. Дайындыққа 20 минут беріледі.
Төртінші орыс, өзбек, ұйғыр және тәжік тілдерінде оқытатын мектептердегі қазақ тілі.Қазақ тілінде оқытатын мектептердегі орыс тілі – тестілеу, үш бөлімге бөлінген 40 сұрақ: лексика мен грамматика, тыңдалым, оқылым.
Бесінші таңдауы бойынша пән: физика, химия, биология, география, геометрия, дүниежүзі тарихы, әдебиет, информатика, шет тілі тестілеу, 40 тесттік тапсырма.
Қорытынды аттестаттау 2017 жылдың 29-шы мамыры мен 9-шы маусым аралығында өткізіледі.