Бірыңғай жинақтаушы зейнетақы қоры берешек компаниялардың тізімін жариялады.
Бұл туралы БЖЗҚ-ның баспасөз қызметі хабарлады.
Келтірілген дерекке сүйенсек, эмитенттердің көпшілігі дефолтқа 2006-2010 жылдар аралығында жол берген. 2016 жылы атаулы құны бойынша берешек сомасы 4,1 млрд теңгеге 2 эмитенттің дефолты тіркелді. 2017 жылғы 1-тамыздағы жағдай бойынша, қорға берешек компаниялардың қарызы 40,5 млр теңгені құрады.
«БЖЗҚ қоры дефолтқа жол берген 21 эмитентке қатысты атаулы құны бойынша 40,5 млрд теңге болатын берешекті (зейнетақы активтерінің 0,6 пайызынан төмен) қайтару жұмыстарын жүргізіп жатыр. Бұл эмитенттердің қаржы құралдары зейнетақы активтерінің құрамына кіреді», – делінген қор хабарламасында.
Жалпы, 1-тамыздағы жағдай бойынша, облигациялардың атаулы құны бойынша берешектердің жалпы сомасы 2014 жылдан бері 161,45 млрд теңгеден 36,45 млрд теңгеге азайған.
«Ал проблемалық эмитенттердің саны 32-ден 19 компанияға қысқарды. Екі компания бойынша берешек толығымен өтелді (атаулы құны бойынша 1,3 млрд теңге)», делінген хабарламада.