Ақтөбеде анасы қайтыс болып, әкесі тастап кеткен төрт жетім бала банкке кепілге қойылған жалғыз баспананы тастап шықты.
Қазір олар жалдамалы пәтерде тұрып жатыр, деп хабарлайды ҚазАқпарат.
Бұл аз болғандай, соттан сотқа сүйреп, қорғансыз балаларға банк қырғидай тиген.
Өйткені ағайынды төрт баланың анасы Гүлмира Сақтағанова екінші деңгейлі банктен 2,5 миллион теңге несие алып, қаза болғанша, яғни 2015 жылға дейін төлеп келген. Ал аяқ-асты қаза болғанда банктен несиесі өтелмеген күйі қалған. Себебі балалар ішім-жеміне әрең ақша тауып отырған.
https://kaz.365info.kz/balalaryn-tiridej-zhetim-tastagan-ake-olardyn-zhardemakhysyn-yyalmaj-alyp-kelipti-268853
Ал балаларды әкесі тағдыр талқысына тастап кеткен. Оған қоса үкіметтен балаларға бөлінген жәрдемақыны көкек-әке ай сайын алып, онымен екінші отбасын асыраған.
Қазіргі күні Сарқұловтардың банкке берешегі 3,7 миллион теңге болып кетіпті. Қарызды қайтара алмаған олар жақында мұрагерліктен бас тартты.
«Біз мұрагерліктен бас тарттық. Сөйтіп, үйді босатып бердік. Ақтөбелік Қанат-Әлия есімді ерлі-зайыпты келіп, бізге үш бөлмелі пәтерді жалдап берді. Олар екі айға пәтерақыны төледі»,- дейді отбасының үлкені Абай Жұмабаев.
Айта кетейік, қазір бұл отбасының балалары кенжесі Мерген Сарқұловты қорғаншылыққа алу құжаттарын да дайындап жатыр. Мектеп оқушысы Мерген оның ағасы, отбасылы Әлішер Сарқұловтың қамқорлығына берілуі мүмкін.
«Біз облыс әкімі Бердібек Сапарбаевқа үміт артып отырмыз. Тағы бір рет кездесіп, сөйлесуді жоспарлап жүрміз»,- деді Абай Жұмабаев.
Алдында бұл балаларды облыс әкімі Бердібек Сапарбаев қабылдап, оларға үйін банкке бере салған дұрыс деп кеңес берген еді.
Ал балаларды жетімдер санатына жатқызып, жеңілдікпен көмек көрсету үшін әкенің құқығынан айыру мәселесі қолға алынған. Жергілікті билік Сарқұловтардың мәселесі өз бақылауымызда деп еді. Лайым солай болсын!