Дариға Назарбаева солай деді.
Ол жұма күні Білім және ғылым министрлігінде өткен кеңес кезінде ішінде жүрген біраз ойларын сыртқа шығарыпты, дейді informburo.kz:
“Бізге болашақта бәрібір қытай тілі керек болады. Қытай біздің Ұлы көршіміз, біздің тағдырымыз – Қытай“,— деп бастапты әңгімесін премьер-министрдің орынбасары Дариға Назарбаева.
Дариға Қытайдың Қазақстан экономикасындағы ең ірі инвестор екенін есімізге салып қойды.
“Қытай қатты дамып келеді. Қытайдың аты – Қытай. Ол алдына жүз жылдап мақсат қоятын алып ел. Ол тек өркендей беретін ел. Және ол біздің ең маңызды досымыз, біздің экономикамыздың ең ірі инвесторы“, — деп қосыпты.
Сондай-ақ, ол жақын арада үштілдік мәселесін шешу керек деді.
“Мемлекет көшбасшысы үштілдік туралы міндет қойды. Соны біз алдағы екі-үш жылда шешуіміз керек. Көптеген отбасылар мұны қолдамайды деседі. Қырсық қазақтар «да бізге ағылшын тілі не керек» деп қасарысады. Әсіресе, оңтүстіктегілер үштілдікті қабылдағысы келмейді екен.
Үштілдік болуы үшін бәрімізге ағылшын тілін үйрену керек, ұйым басшыларынан бастап профессорлар мен мұғалімдерге дейін. Елдің әрбір азаматы кем дегенде, үш тілді: қазақ орыс, ағылшынды жетік меңгеруі тиіс“, – деді ол.