Менингиттен басталған дау министр мен әкімді тәжікелестіріп тынды. Денсаулық сақтау министрі: „Қаскелеңдегі жағдайы жаман аурухананы жабам„ деп қаһарына мінсе, Алматы облысының әкімдігі оны жаптырмаймын деп тас-түйін боп отыр.
Мұндайды күтпеген Денсаулық сақтау министрі қарап қалмады. Бүгін Үкімет жиынынан шыққан соң, Елжан Біртанов жыр болған ауруханаға қатысты тағы бір мәлімдеме жасады. Шенді сөзін қысқа қайырсақ, „жаппасаңдар соттасамыз„ дегенге келеді.
Айта кетелік, менингит дерті бұрқ етіп, бірнеше кісі көз жұмғанда, бүкіл үкімет жауапты министрді жабылып атқа мінгізіп, бәрі сабалағандай боп Алматыға жөнелткен. Ал намысы әбден жанылған министр мұнда келе сап, түнделетіп ұрын келіп, дәрігерлерге кәрін төкті. Әрине, әлеуметтік желілерде сорақы жағдайы әшкере болған Қаскелеңдегі жұқпалы аурулар ауруханасын да назардан тыс қалдырмады. Онда да барды. Өз көзімен көріп, өз құлағымен жағдайдан қанықты.
Сөйтіп, Алматыдан кетерінде министр:
– Бұл аурухана жабылады, бәрін жаңа ғимаратқа көшіреміз, қазіргісі жұмысқа жарамсыз
деп кесіп айтты.
БАҚ бұл ақпаратты сүйіншілеп, тарата жөнелді. Бәрі министр мықты десті. Бірақ біразға дейін ғана…
https://kaz.365info.kz/kyji-adamshoshyrlykh-zhagdajda-foto-318282
Көп ұзамай, бірнеше күннен соң „Қаскелеңдегі ауруханаға жабылмайтын болыпты„ деген ақпарат шықты.
Министрдің оң жамбасына келе қоймайтын мұндай ақпаратты Алматы облысының әкімдігі таратты.
„Тұрғындардан түскен арыздардан кейін, Алматы облысының әкімдігінде аурухананы жаппау туралы шешім қабылданды. Адамдар ауырсақ, сонау Талдықорғанға жете алмай қаламыз деп үрейленуде. Сондықтан оны жаппаймыз, күрделі жөндеуден өткіземіз. Оған қазір қаражат қарастырылып жатыр„ делінді облыс әкімдігінің баспасөз қызметі таратқан хабарламада.
https://kaz.365info.kz/sender-meningitten-koz-zhymgan-dimashtyn-anasy-ashhy-shyndykhty-ajtty-video-319121
Алайда облыс әкімдігінің бұл шешімі министрге ұнамады. Бүгінгі сөзінде ол бұл істі өзінің жеке қадағалауына алатынын да аңғартып қалды.
«Алматы облысының әкімшілігі Қаскелең қаласындағы инфекциялық аурухана туралы мәлімет берді. Облыстағы бірнеше ауданның науқастары осы мекемеге келіп жатады. Бірақ аурухананың жағдайы – өте нашар. Сондықтан 2017 жылдың қазанында Қоғамдық денсаулық сақтау комитеті аталған мекемені арнайы тексеріп, әкімшілікке ауруханадағы кемшіліктерді жою қажеттігін ескерткен.
Әкімшілік «шілденің аяғына дейін бәрін жөндеп бітіреміз» деп, өзінің кепілдігін берген. Егер олар аурухананы жөндесе, мекеме өз жұмысын атқара береді. Егер талап орындалмаса, біз сот арқылы аурухананы жапқызамыз»,
– деді министр Үкімет отырысынан шыққан соң.
https://kaz.365info.kz/zingittej-zhigit-edi-olzhas-sylejmenov-meningitten-koz-zhymdy-318076
Мұнымен тоқтамаған министр:
«Біз Алматы облысындағы барлық ауылдағы объектілер санитарлық нормаға жауап беретін болады деп үміттенеміз», – деп салды.
Соған қарағанда, Алматы облысының ауруханалары биылдыққа тексеруден көз ашпайтын секілді.
Бұл үшін олар кімге „рақмет„ айтуы керектігін біз айтпасақ та ұққан болар…
https://kaz.365info.kz/tokhaev-yrsyp-sagyntaev-karine-mindi-birtanov-almatyga-baratyn-boldy-318336