Елбасы Нұрсұлтан Назарбаевтың «Бес институттық реформаны жүзеге асыру жөніндегі Ұлт жоспары – 100 нақты қадамды» іске асыру бағытында әр салада нақты істер атқарыла бастады. Автокөлік саласы бойынша тасымал көлемінде 2016 жылдың 8 айында оң өзгерістер байқалады. Мәселен, осы мерзімде 1 984,4 миллион тонна жүк тасымалданған. Бұл өткен жылдың осы мерзімімен салыстырғанда 0,25 пайызға артық көрсеткіш. Жолаушы тасымалында да оң нәтиже бар. Біз мысалға алып отырған мерзімде өткен жылғы көрсеткіштен 2,3 пайызға артық нәтижеге қол жеткізілген.
Саланы дамыту мақсатында автобус паркі біраз жаңартылды. Бұл өз кезегінде жолаушы тасымалы қызметі сапасын арттырды. Бүгінгі таңда Астана, Алматы, Қарағанды, Павлодар, Өскемен қалаларында қала маңы мен қалааралық бағыттарда билеттер электронды сатылымға шығарылды. Отандық жүк тасымалдаушыларды қолдаудың бірқатар шаралары қарастырылып жатыр.
Биыл осы салада Дания, Португалиямен келісім жасауға, Сербия, Норвегия және Франциямен келісімдерді бекітуге дайындықтар жүргізілуде. Осы жылдың 11 ақпанында Инвестиция және даму министрлігінің №546 «Автокөлікпен жүк тасымалдау ережелерін бекіту туралы» жарлығы күшіне еніп, бұл автокөлікпен жүк тасымалдау ережелерін реттейтін болады.
Қазақстан мен Австрия мемлекеттері арасында халықаралық автокөлікпен жүк тасымалдау туралы келісім жасалды.
Осы жылдың 28-29 сәуірінде қазақ-түрік комиссиясы халықаралық автокөлік тасымалы жөнінде кезекті мәжілісін өткізіп, тараптар халықаралық автотасымал саласында екіжақты ынтымақтастық мәселелерін талқылады. Қабылданған шаралар нәтижесінде осы жылдың соңына дейін автобус парктерін 10 пайызға дейін жаңартылу көзделуде. Ал халықаралық нарықтағы қазақстандық тасымалдаушылар үлесін 43 пайызға арттыру жоспарда тұр.
Тасымал мәселесі сөз болғанда жол сапасы жайында әңгіме қозғамау мүмкін емес. Жол салу, жолды жөндеу жұмыстары соңғы жылдары көңіл көншітеді. Себебі, бұл саланың маңыздылығына Елбасы Нұрсұлтан Назарбаев өзінің Қазақстан халқына арналған әр Жолдауында арнайы тоқталып келеді. Биыл да республикалық маңызы бар бірқатар жолдарға жөндеу жұмыстары жүргізілуде. Атап айтар болсақ, олардың қатарында Батыс Еуропа – Батыс Қытай, Астана – Теміртау, Алматы – Қапшағай, Астана – Павлодар – Семей, Бейнеу – Ақтау, Қапшағай – Талдықорған, Көкшетау – Петропавл, Орал – Каменка және Ақтөбе – Атырау жолдары бар. Бұл жолдардың бәрі «Нұрлы жол» мемлекеттік бағдарламасында қарастырылған. Жөндеу жұмыстары Ақмола, Ақтөбе, Алматы, Атырау, Жамбыл, Батыс Қазақстан, Қарағанды, Қостанай, Маңғыстау, Павлодар, Солтүстік Қазақстан және Оңтүстік Қазақстан облыстарындағы 1,7 мың шақырым жолды қамтиды.
Алғашқы 9 айдың қорытындысы бойынша жылдық жоспардағы жөндеу жүргізілетін жолдың 75 пайызы орындалған. Телімдерге 756 шақырым асфальт және цементбетон жабындысы төселді. 3 миллион тонна қиыршық тас, 250 мың тонна цемент, 125 мың тонна отандық өнеркәсіптің жол битумы пайдаланылды. Жол жөндеу жұмыстарына 75 мың адам, 30-дан астам мердігер ұйым тартылды. Жұмысқа атсалысқан компаниялардың 20-дан астамы отандық.
Жыл қорытындысы бойынша Батыс Еуропа – Батыс Қытай көлік дәлізі, Астана – Теміртау, Алматы – Қапшағай – Талдықорған, Бейнеу – Шетпе және Көкшетау – Петропавл телімдері ашылады.
Дереккөз: Айқын газеті