Желтоқстан көтерілісінің отыз жылдығына орай Шығыс Қазақстан облысындағы Аягөз қаласында «Тәуелсіздік тағылымы» атты ескерткіш бой көтерді.
Бұл ескерткіш — Қазақстан аумағында үлкендігі жағынан Желтоқсан оқиғасына арналған екінші монумент.
Алыстағы Алматыдағы сол ызғарлы желтоқсанда жанын қиған боздақтардың рухына тәу етуге Аягөздің тұрғындары мен қонақтары түгел келді.
Дос Көшім, Болат Дүйсенбі, Бейбіт Қойшыбаев бастаған қайраткерлер мен Аягөз ауданының әкімі Бақытжан Баяхметов, Аягөз қаласының әкімі Руслан Қасымжанов сөз сөйлеп, ескерткіштің лентасын қиып берді.
Бұл ескерткішті тұрғызу бастамасын көтеріп, оның салынуына зор еңбек сіңірген азаматтардың да аты-жөндерін атай кетуді жөн санаймыз. Олардың арасында ҚР Мәжіліс депутаты Нұртай Сәбильяновқа, «Желтоқсан ақиқаты» республикалық қоғамдық бірлестігінің төрағасы Нүкен Сәдуұлына, ұйым мүшелері Сапура Токсейітова, Нүкен Бейсенғазы, Күлмәриям Тойболдиева, Роза Искакова, Сәтбай Әлімбаев, жергілікті білім басқармасының бастығы Нұрғали Әзімбаев, “желтоқсаншы” Қайрат Саханов, «Желтоқсан ақиқатының» Алматы облыстық филиалы төрағасы Ізтілеу Тойшыбайұлы, «Желтоқсан ақиқаты» Алматы қалалық филиалының төрайымы Күміс Күргенбаева, Астана қалалық филиалының төрағасы Ержан Ұзақ, бірлестіктің белсенді мүшесі Санат Қайырбаев, «Желтоқсан қоғамы» бірлестігінің төраға орынбасары Жүрсін Тастекеев сияқты азаматтарға алғыс айтылды.
Ашылу салтанатынан кейін Қатым түсіріп, ас берілді. Желтоқсанда қыршынынан қиылған қазақтың ұл-қыздарының рухына бағышталып құран оқылды.
Айта кетсек, «Желтоқсан ақиқаты»республикалық қоғамдық бірлестігі 2010 жылы мамырдың 31-і күні Өскемен қаласында Желтоқсан көтерілісінің құрбандарының бірі – Сәбира Мұхаметжановаға өзі оқыған педагогикалық колледждің бұрышына мәрмәр ескерткіш тақта қойған болатын. Одан бұрын Ләззат Асановаға, Сұлухан Назароваға оқыған мектептеріне мәрмәр тастан тақтайшалар орнатылып, жерленген жерлеріне граниттен ескерткіштер тұрғызылды.
Тәуелсіз елдің жас ұрпағы өз ұлтының тарихын ұмытпауы тиіс. Ұлттық сананы оятып, Тәуелсіздіктің тағылымын жігерлі жастарымыз терең түсінуі үшін осындай игі шаралар әлі де жалғасын табады деген сенімдеміз!
Күміс Күргенбаева,
«Желтоқсан ақиқаты» бірлестігінің Алматы қалалық филиалының төрайымы