Атырауда шекарашылар мен ауылдықтар арасындағы жанжалға кім кінәлі екені анықталды

Атырау облысында саппен кетіп бара жатқан сарбаздарды көлігімен жанай өткен Жанбай селосының тұрғыны қамаққа алынды.

Бұл туралы Атырау облысы Исатай аудандық сотының баспасөз қызметі хабарлады.

Атырау облысының Исатай ауданының Жанбай ауылында әскери бөлімнің қызметкерлері кешкі спорттық жүгіруден соң өздерінің әскери бөлімшелеріне қарай жол жиегімен жүгіріп келе жатқан кезде, «Тойота Лэнд Крузер» автокөлігі оларды жанай өткен. Салдарынан екі сарбаз жеңіл жарақат алған. Әскери қызметкерлер әскери бөлімнің аумағына кірген кезде бірнеше көлікпен келген ауыл тұрғындары жасақ аумағына кіруге тырысқан. Сол уақытта автоматтан жоғарыға оқ атылып, әскери бөлімнің алдына адамдар тобы жиналған. Сол кезде ауыл тұрғыны С.А. қоғамдық орында құқық қорғау органы өкілдерін балағаттаған.