Ресей премьер-лигасында ойнайтын «Уфа» қатарын биыл қыста толықтырған қазақстандық жас футболшы Еркебұлан Сейдахмет команданың негізгі құрамына іліне алған жоқ.
Ресейлік клуб Еуропа лигасы алдында Сейдахметті құрамаға қоспаған.
«Уфа» Еуропа лигасындағы жорығын 26 шілде күні бастайды. Олар екінші іріктеу раунды аясында словениялық «Домжалемен» кездеспек. Ал Еркебұлан болса «Уфаның» Еуропа лигасындағы ойындарына қатыспайды.
Еркебұлан жаңа командасына биыл ақпан айында ауысып барған болатын. Оған дейін Тараздың «Монтажник» және «Тараз» клубтарында өнер көрсетті. Биылғы маусымда Ресей чемпионатында 2 матчқа ғана қатысты. Ал қалған 5 турда жарақатына байланысты алаңға шыға алған жоқ.
Чемпионат аяқталғаннан кейін ойыншы Германияға емделуге аттанған. Клуб президенті Шәміл Ғазизовтың айтуынша, қазақстандық ойыншының тағдыры үшін алаңдаудың қажеті шамалы.
«Барлығы бапкерлік штабтың сызбасы бойынша жұмыс істеуде» депті ол.
Осыған дейін БАҚ беттерінде Еркебұланның «Уфадан» алматылық «Қайратқа» ауысатыны туралы ақпарат тараған. Бірақ сәл кейінірек ойыншының өзі бұл ақпаратты жоққа шығарды.
https://kaz.365info.kz/byzylma-bala-erkebylan-sejdahmet-bajzakhovaga-lajk-basyp-zhyr-306865