Павлодар қаласының билігі Жеңіс күні құттықтап, құрмет көрсетпеген Қазақстан ардагерінен кешірім сұрады.
Оның себебін шенділер техникалық себептермен байланыстырды, – деп хабарлайды Tengrinews.kz.
“Ата ренжімеңіз, бізді кешіріңіз. Қала әкімі атынан кешірім өтінеміз. Ол қазір ауруханада. Өзі келе алмады. Өтінеміз, бізді кешіріңіз, біз сізді ұмытпаймыз”, – деді Павлодар әкімінің орынбасары Берік Ақылбеков.
“Неге бұлай болғанын айта алмаймын. Уақыт тығыз болды, ардагерлерге пәтер берілді. Мереке жалғасып, шаралар өтіп жатыр, бірақ, техникалық жағдайларға байланысты кемшіліктер болды. Бүгін ардагерлерімізге құрмет білдіруді жалғасытырып жатырмыз. Кешіктік әрине, дегенмен құттықтадық, батасын алып қайттық”, – деді Ақылбеков.
Еске салайық, ардагердің немересі Жанат Серімов Instagram желісіндегі парақшасы арқылы Павлодар билігі 109 жастағы ардагерді құттықтамағаны туралы хабарлаған. Кейін ардагердің қызы Сара Серімова да осыны айтты. Ал Павлодар әкімшілігінің өкілдері Бухаредин Серімовты естен шығармағанын айтады. Дегенмен әкімдік өкілдері 102 ардагердің барлығын қамтып үлгермей жатқанын атап өтті. Олардың айтуынша, Бухариден Серімовтің үйіне барған кезде ол үйінде болмай қалған.