Астанада мәдениет пен өнер өкілдерінің ірі форумы өтті

Марапатталғандар қатарында:
 • «Құрмет» орденімен — Лариса Насретдинова («Отырар сазы» оркестрі);
 • «Ерен еңбегі үшін» медалімен — Асан Нұрбергенов, Жәнібек Сейдахметов, Жасұлан Сыдықов, Медет Орымбаев («Mezzo» тобы) және Тимур Бонданк (Республикалық неміс драма театры);
 • «Шапағат» медалімен — Сәуле Байниетова (Наталья Сац театры);
 • «Қазақстанның еңбек сіңірген қайраткері» атағымен — Күләш Молдағалиева (Байсейітова атындағы музыка мектебі) және Біржан Жалғасбаев (С. Мұқанов театры) марапатталды.

Бұған дейін Мемлекет басшысы Қасым-Жомарт Тоқаев ел руханиятына сүбелі үлес қосқан мәдениет және өнер қайраткерлерін Ақордада марапаттап, бұл саланың ел дамуы үшін маңыздылығын ерекше атап өткен болатын.

Форум аясында 20-дан астам тақырыптық сессия мен панельдік пікірталас өтті. Оларға министрліктердің өкілдері, отандық және шетелдік сарапшылар, мәдениет саласының майталмандары қатысты. Франция, Қытай, Италия, Түркия, Оңтүстік Корея, Өзбекстан мен Ресейден арнайы келген спикерлер де өз тәжірибелерімен бөлісті.

30-дан аса білім беру бағытындағы іс-шарада қатысушылар музей ісі, театр менеджменті, цифрлық технологиялар және мәдени маркетинг бойынша пікір алмасты. Сонымен қатар Қазақстан музейлерінің конгресі ұйымдастырылып, экспозициялық жұмыстың жаңа әдістері, цифрландыру және көрерменмен байланыс орнату жолдары талқыланды.

Форум мемлекеттік мәдени саясаттың басым бағыттарын, креативті индустрияны дамыту, материалдық емес мұраны сақтау және халықаралық мәдени байланыстарды нығайту мәселелерін талқылайтын маңызды алаң болды. Ауқымды шара гала-концертпен түйінделеді.