Арзан ипотека бәріне жетеді – министр
ҚР Инвестициялар және даму министрі Жеңіс Қасымбектің айтуынша, 7 пайыздық ипотекаға салынатын қаржы барлығына жетуі тиіс.
Бұл туралы ҚазАқпарат хабарлады.
«Шыны керек, арзан ипотека бойынша жұмыс істейтін жаңа компанияның шарттары өте тиімді болады. Жылдық мөлшерлеме – 7 процент, мерзімі – 25 жыл. Сосын алғашқы жарна да Тұрғын үй құрылыс жинақ банкімен салыстырғанда тиімді болып тұр. Ол жақта алғашқы жарна 30-50 процент болса, жаңа бағдарламада 20 процент қана. Әрине, халық тарапынан ондай шарттарға сұраныс жоғары болады. Соның арқасында ипотека мен құрылыс саласы жандана түседі», – деді Жеңіс Қасымбек Үкімет отырысынан кейінгі баспасөз мәслихатында.
«Қазіргі кезде Тұрғын үй құрылыс жинақ банкі барлық ипотеканың жартысынан көбін алып отыр. Меніңше, жаңа компанияның келуімен бәсеке қыза түседі.
Әлбетте, халық арзан ипотеканы асыға күтіп отыр. Компания құрылғаннан кейін адам кезегі де көбейді. Оны да жақсы түсінеміз. Алайда Мемлекет басшысы ипотека саласына бір триллион теңгеге дейін қаржы тартуды тапсырған болатын. Сондықтан жаңа бағдарлама қарбалассыз іске асырылуы тиіс»,
– деп атап көрсетті Жеңіс Қасымбек.
Айта кетейік, Парламент палаталарының бірлескен отырысында Мемлекет басшысы Нұрсұлтан Назарбаев қазақстандықтарды баспанамен қамтамасыз етудің жаңа бағдарламасын әзірлеуді тапсырды. Осыған байланысты ҚР Ұлттық банкі жанынан 7 проценттік ипотеканы беретін жаңа компания құрылады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе