Амандық Баталов тау бөктерін зерттеуді тапсырды
Алматы облысының əкімі Амандық Баталов Кеген жəне Райымбек аудандарындағы тау бөктерін зерттеуді тапсырды.
Бұл туралы Baq.kz хабарлады.
Алматы облысының əкімі Амандық Батталов Көлсай сайына ұшып келіп, жедел штабтың жұмысына қатысты. Тау бөктеріндегі ахуал туралы ҚР ІІМ ТЖК «Қазселденқорғау» ММ басшысы Тоқтар Баймолдаев баяндады.
«Опырылған жер Көлсай көлінің арнасына жетті. Топырақтың қозғалысы сағатына бір метрден жылжуда. Топырақ өзеннің арнасын жауып тастауы мүмкін. Ал өзен жаңа арнамен ағуы да ықтимал. Қазір өзеннен екі куб су өтіп жатыр. Мамыр айының аяғы мен маусымның басында өткізілетін су көлемі 30 кубқа жетеді. Топырақ массасы өзен суы арқылы шайылады. Бірақ бұл өзен түбінде кішкентай бөліктердің пайда болуына ықпал етіп, бұл өзен сағасының шайылуына алып келуі мүмкін. Біз су өткізуді эвакуациялық канал арқылы қамтамасыз етсек дейміз. Бұл орайда жарылыс жұмыстары қолданылуы мүмкін», – деді Тоқтар Баймолдаев.
«8 сəуірде бұл жерде жер сілкінісі болған, оның артынан жауын жауды. Мұнда тектоникалық жарылу сызығы бар. Осының бəрі жинақтала келе, қалыптасып отырған жағдайды туғызуы мүмкін. Қазір тау бөктерлеріне, əсіресе елді мекендер маңына мұқият зерттеу жасау керек», – деді Амандық Баталов.
Сонымен қатар, облыс əкімі электр желілерінің айналма жолын жəне геологиялық жағдайларды ескере отырып жол салу жұмыстарын жалғастыруды тапсырды.
Қазір оқиға орнына барлық қажетті техника жұмылдырылған, тау массасының қозғалысы сағат сайын бақыланып отыр. Елді мекендерге қауіп төніп тұрған жоқ. Сондай-ақ облыс əкімінің баспасөз қызметінен хабарлағандай, кейбір БАҚ-та жарияланған Саты ауылына апаратын жол жабылды деген ақпарат шындыққа жанаспайды. Бұл жол жабылған жоқ, ашық. Тау массасының қозғалуы «Көлсай көлдері» Ұлттық саябағы кардоны маңында орын алған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе