Дін және азаматтық қоғам істері жөніндегі министр Дархан Кәлетаев пен Алматы әкімі Бауыржан Байбек қаладағы азаматтық қоғам институттарын дамытуға бағытталған Жол картасына қол қойды.
«Белсендi мегаполис» деп аталған бұл құжатқа Алматы қоғамдық кеңесінің кеңейтілген отырысында қол қойылды.
Бұл туралы 365info.kz порталына ҚР Дін және азаматтық қоғам істері жөніндегі министрліктің баспасөз қызметі хабарлады.
«Бұл құжат министрлік пен қала әкімдігі арасында азаматтық қоғам, дін және жастар саласындағы мемлекеттік саясаттты жүзеге асырудағы ең үздік тәжірибелер, құралдар мен тетіктерді бірлесе пайдалану аясын кеңейте түседі», — деп атап өтті Дархан Кәлетаев.
Атап айтқанда, азаматтық қоғам саласы бойынша Алматыда үкіметтік емес ұйымдарға семинарлар өткізетін және де әлеуметтік зерттеулер жүргізетін арнайы Азаматтық орталық ашу жоспарланған екен. Екі тарап сондай-ақ азаматтық қоғам саласында U38 университеттер альянсымен тұрақты серіктестік орнатуды көздеп отыр.
Ал дін саласына келсек,
алматылық имамдар үшін арнайы біліктілікті арттыру курстарын ұйымдастыру да жоспарланыпты.
Сонымен қатар, имамдар үшін республикалық семинарлар мен тренингтер өткізіліп, ақпараттық-ағартушылық материалдар әзірленбек.
Жастар саясаты саласында ТМД жастарының форумын өткізу, волонтерлердің республикалық слетін ұйымдастыру жөніндегі нақты жоспар құрылған.
Алматыдағы жұмыс сапары аясында министр Дархан Кәлетаев сондай-ақ ислам мәдениетінің «Нұр-Мүбәрак» Египет университетіне барып қайтуды және мегаполистегі үкіметтік емес ұйымдар басшыларымен кездесу өткізуді жоспарлауда.