Алматыда ветеринария ғылымы мен биоқауіпсіздікке 120 жыл толуына орай халықаралық ғылыми конференция өтті

Конференцияны ашқан ҚР Денсаулық сақтау министрі Ақмарал Әлназарова институттың еліміздегі алғашқы ғылыми мекемелердің бірі екенін атап өтіп, оның ветеринария, мал шаруашылығы және қоғамдық денсаулық сақтау салаларына қосқан үлесіне тоқталды.
«120 жылдан астам уақыт ішінде институт бруцеллез, сібір жарасы, аусыл сынды аса қауіпті ауруларға қарсы ондаған вакциналар, диагностикалық әдістер мен емдік құралдар жасап шығарды», — деді министр өз сөзінде.

Конференцияның негізгі мақсаты — ветеринария ғылымы мен тәжірибе арасындағы байланысты нығайту, халықаралық ынтымақтастықты кеңейту, биологиялық қауіпсіздік пен инновациялық технологияларды енгізуге бағытталған стратегиялық басымдықтарды айқындау.

Пленарлық отырыстар барысында отандық және шетелдік сарапшылар ғылыми баяндамалар жасап, ветеринария ғылымының болашақ даму бағыттарын қарастырды. Талқыланған тақырыптар қатарында:
 • жануарлар ауруларын диагностикалау, алдын алу және емдеу;
 • биологиялық қауіпсіздікке қатысты биотехнологиялық жаңалықтар — зерттеуден өндіріске дейін;
 • молекулалық биология және микроорганизмдер геномикасы арқылы биологиялық және азық-түлік қауіпсіздігін қамтамасыз ету;
 • ветеринариядағы пәнаралық ғылыми тәсілдер болды.

Сонымен қатар, конференция аясында ғылыми жетістіктер көрмесі ұйымдастырылып, институт тарихына арналған мерейтойлық кітаптың тұсауы кесілді.

1905 жылы негізі қаланған Қазақ ветеринария ғылыми-зерттеу институты — Қазақстандағы ең көне ғылыми мекемелердің бірі. 2023 жылдан бері институт ҚР Денсаулық сақтау министрлігіне қарасты «QazBioPharm» ұлттық холдингінің құрамына енген.