Алматыда Аймақтық диагностикалық орталық сатылымға қойылды
Мемлекеттік мүлікті жекешелендіру шарасы бойынша Алматыда Аймақтық диагностикалық орталық пен Қастеев музейінің жанындағы өнер мектебі электронды тендерге шығарылды.
Бұл туралы ҚазАқпарат хабарлады.
Аймақтық диагностикалық орталықтың бастапқы бағасы 4,5 млрд теңгеге бағаланып отыр. Сатып алудың басты шарты – кәсіпорынның мүліктік кешен ретіндегі профилін сақтау. Электронды тендер 12-қыркүйекке белгіленді.
Қастеев атындағы бейнелеу өнері және техникалық дизайн мектебінің құны 328 млн теңгеге бағаланған. Сауда 20-қыркүйекте өтеді.
«Үш жылға бөліп төлеу қарастырылған. Алғашқы алдын-ала жарна мөлшері сатылған бағаның 15 процентінен кем болмауы тиіс. Алғашқы жарна сату-сатып алу келісімшарты жасалған күннен бастап 30 күнтізбелік күн ішінде енгізілуі керек. Кейінгі төлемдер жасалғанда әлі төленбеген сомаға ҚР Ұлттық банкінің қайта қаржыландыру ресми ставкасына сәйкес пайыздық мөлшерлеме қосылады.
Жылжымайтын мүлік жер телімінен бөлек сатылады.
Сатып алушы жер телімінің кадастрлық (бағалау) құнын ҚР Жер кодексіне сай бөлек төлейтін болады», – делінген хабарландыруда.
Сатушы – Алматы қалалық Қаржы басқармасы бұған дейін де «Қайрат» футбол клубындағы әкімдіктің 30 процент үлесін саудаға шығарған болатын. Алайда, оны сатып алуға ынта білдіргендер болмаған соң сауда өтпеді. Қазақстанда электрондық тендер 2016 жылдың басынан бері қолданыста. Мұнда әр қатысушы өзінің бағасын электрондық конвертке жүктеп, реестрдің арнайы веб-парақшасына тіркейді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе