Қарағандыда бір ер адам әлеуметтік желіде алауыздық тудыратын теріс пиғылды хабарламалар мен суреттерді бөлісу арқылы фашистік свастиканы насихаттағаны үшін сотталды.
Оған 4 жыл 8 айға бас бостандығынан айыру жазасы кесілді деп хабарлады облыстық соттың баспасөз қызметі.
Тергеу дерегі мен сот шешімі бойынша, 38 жастағы ер адам неонацизмнің жақтасы болып, өз айналасында фашистік идеяны белсенді түрде насихаттап келген. Қарағанды облысы ІІД қызметкерлері ер адамды тауып, қылмыстық жауапкершілікке тартты.
«Іс материалдары бойынша анықталғандай, ер адам қылмыстық әрекетін іске асыру үшін «ВКонтакте» әлеуметтік жесілісндегі жеке парақшасын пайдаланған. Ол желіде ұлтаралық және нәсіларалық алауыздық туғызатын жазбалар жариялап отырған. Бұл ретте фашистік свастика бейнеленген туды қолданыпты», – деп жазылған сот шешімінде.
Сот 38 жастағы қарағандылық тұрғынды ҚР ҚК 174-бабы 1-бөлігі, яғни “Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыр” бойынша кінәлі деп тауып, 4 жыл 8 ай мерзіміне бас бостандығынан айырды.
Қазіргі уақытта құқық қорғаушы органдар осы тәрізді қылмыстық әрекеттердің алдын алу мақсатында тиісті шаралар жүргізуде.