Ақтауда «Код-граббер» электронды құрылғысын қолданып, көлік тонаумен айналысқан қылмыстық топ қолға түсті.
Тараз қаласының үш азаматы алдын ала таңдаған көлігін сырттай бақылап, иесі автотұраққа қалдырған сәтте салонда қалған дүниесін жымқырып отырған деп хабарлады „Хабар-24„ телеарнасы.
«Код-граббер» кез келген көліктің дыбыстық белгі беру жүйесін бұзып ашуға мүмкіндік береді. Сондықтан ұйымдасқан топтың заңсыз әрекетінен зардап шегушілердің саны әлі де артуы мүмкін.
Болат Лұқманов, ІІД ұйымдасқан қылмысқа қарсы күрес басқармасының басшысы:
– Қолға түскен азаматтар тергеу абақтысына қамалды. Олар заңға қайшы әрекеттерін өткен мамыр айынан бастағандарын мойындап отыр. 31 және 33 жастағы күдіктілердің Ақтаудан басқа қалаларда көлік тонауға қатысы барлығы анықталып жатыр. ҚР қылмыстық Кодексі 262-ші бабының екі бірдей тармағымен іс қозғалды. Сотқа дейінгі тергеу жалғасуда.